Шүүгч Неоа Милло ням гарагт Брестийн эсрэг болсон тоглолтын үеэр Лионы дасгалжуулагч Паулу Фонсека түүнийг мөргөхийг завдсан хэмээн мэдэгдлээ.
VAR Брестийн багийн торгуулийн цохилтын шаардлагыг шалгаж байх үед Фонсека ууртайгаар шүүгч рүү очиж, талбайн захад түүний толгой руу өөрийн толгойгоо хүчтэй ойртуулсан байна.
Эцэст нь торгуулийн цохилт олгогдоогүй ч Фонсека аль хэдийн хяналтаа алдсан байсан тул улаан хуудас авч, талбайг орхисон. Францын мэдээллээр тэрбээр Лиг 1-ийн сахилгын кодексийн 8-р зүйлийг зөрчсөн хэмээн үзэж, “айлган сүрдүүлэх, заналхийлсэн авир”-ын улмаас долоон сар хүртэлх хугацаагаар шүүгчийн бүсэд ажиллах эрхээ хасуулах эрсдэлтэй болжээ.
Фонсекагийн түрэмгий авир шүүгчийг гайхшруулав
Португал мэргэжилтэн клубээсээ ч сахилгын шийтгэл хүлээх магадлалтай бөгөөд тоглолтын дараа уучлалт гуйсан ч шүүгч Милло түүний авирт цочирдсон гэдгээ хүлээн зөвшөөрсөн байна.
Record ban incoming. This is disgraceful behaviour. pic.twitter.com/KsLRcX7Gjz
— REFSIX (@refsix) March 2, 2025
Тэрээр L’Équipe сонинд өгсөн ярилцлагадаа:
“Тэр надад маш сүрдэм байдалтайгаар үсрэн ирсэн. Би ч шууд улаан хуудас үзүүлсэн. Үүний дараа нөхцөл байдал бүр ч хяналтаас гарсан.
“Тэр намайг бүр цохихыг завдсан. Яг үнэндээ мөргөхийг оролдсон. Би эцсийн шийдвэрээ хэлж амжаагүй байхад ийм явдал болсон. Шийдвэр нь торгуулийн цохилт олгоогүй гэсэн утгатай байсан. Нүдээр харсан байдлаар хамар хавьцаа бага зэрэг шүргэлцсэн байж болзошгүй” хэмээн ярьжээ.
Фонсекагийн хэрэг Лонгориагийн араас яригдаж байна
Фонсекагийн энэ үйлдэл Марсель клубын ерөнхийлөгч Пабло Лонгория шүүгч Жереми Стинатын талаар хийсэн мэдэгдлийнхээ төлөө 15 тоглолтод оролцох эрхгүй болсон шийтгэл авсны дараа тохиосон юм.
Лонгория Марсель клуб Оксер багт 3-0 харьцаатай хожигдсон тоглолтод Стинат шүүгчээр ажилласныг эсэргүүцэж, хамгаалагч Дерек Корнелиус улаан хуудас авсны дараа “жинхэнэ авлига” хэмээн мэдэгдэж байсан билээ.
