“Жон Сина гэж хэн бэ?” гэж асуувал, асуусан хүнээсээ шалтгаалаад хариулт нь өөр өөр байна. Зарим нь түүнийг WWE-ийн домогт супер од гэвэл, зарим нь амжилттай кино жүжигчин, харин өөр хэсэг нь түүнийг Make-A-Wish-ийн “ноён” гэж нэрлэнэ.
Онцгой авьяастай бөх
2002 онд WWE-д хөл тавьснаас хойш Синагийн дүр төрх олонтаа хувьсан өөрчлөгдсөн. “Ruthless aggression” үзэлтэй шинэхэн залуугаас эхэлж, “Doctor of Thuganomics” нэртэй реппер дүрд шилжсэн бол эцэст нь “Never Give Up” буюу “Хэзээ ч бууж өгдөггүй” хандлагаараа танигдсан баатар болж төлөвшсөн юм.
Түүнийг дэвжээн дээрх чадвараар нь шүүмжилж, “чи барилдаж чаддаггүй” гэх уриа хааяа сонсогдож байсан ч Wrestlenomics сайтын редактор, үүсгэн байгуулагч Брэндон Тёрстоны хэлснээр,
“Түүнийг онцгой авьяастай бөх гэдэгт эргэлзэх зүйл байхгүй.”
Түүний үзэж байгаагаар 2005 оноос WWE илүү хянагдсан, гэр бүлд ээлтэй PG эринд шилжиж, өмнөхөөсөө илүү зохиомжтой болсон ч Сина энэ орчинд бүр ч цэцэглэн хөгжсөн.
“2005-аас 2015 оны хооронд тэр WWE-ийн хамгийн том ‘татагч’ байлаа,” хэмээн Тёрстон онцлоод, Синагийн бараа бүтээгдэхүүн борлуулалтаараа байнга тэргүүлж байсныг нэмж дурдсан юм.
“Тэр үеийн WWE-ийн эдийн засгийн хувьд хамгийн чухал бөх нь гарцаагүй Сина байсан. Pay-per-view захиалга, ТВ үзэлт, шууд тоглолтын орлого гээд бүх талаараа.”
Дэвжээнээс гадна ч хүмүүсийн анхаарлыг татдаг, сонсохыг хүсдэг дүр төрхтэй нэгэн байсан нь түүнийг илүү онцгой болгосон гэж тэр хэлжээ.
Олон жилийн хүнд ачаалал
24 настай Жо Кларксон Синаг анх таван настайдаа зурагтаар харж байжээ.
“Бие махбодод асар их ачаалал өгдөг энэ салбарт ийм удаан хугацаанд тогтвортой байж чадна гэдэг үнэхээр гайхалтай,” гэж тэр хэлээд,
“Цаг хугацаа өнгөрөх тусам хүмүүс түүнийг зөвхөн бөх биш, хүн талаас нь улам их хүндэлдэг болсон” хэмээн нэмжээ.
37 настай Сабрина Николь Синагийн 2002 оны дебют тоглолтыг санаж явдгаа дурсахдаа, түүний харизм-ыг онцолсон юм.
“Түүнийг од болгодог нэг зүйл түүнд үргэлж байсаар ирсэн. Мөн карьерийнхээ ихэнх хугацаанд сайн талын дүрийг хадгалж чадсан.”
Боломжийг зөв цагт атгасан нь
The Rock, Stone Cold Стив Остин нар тогтмол барилдахаа больсны дараа WWE шинэ од хайж байв. Тэр үед удирдлагууд Синаг итгэж болохуйц, хөдөлмөрч хүн гэж харсан гэж Тёрстон үздэг.
Эцсийн шийдвэрийг тухайн үеийн WWE-ийн дарга Винс МакМахон гаргасан нь тодорхой. Микрофон дээрх харилцаа, зах зээлд борлогдох чадвар, урт хугацаанд ашиг авчрах боломжийг нь бүгдийг тооцсон сонголт байлаа.
2015 оноос Сина барилдаанаас бага багаар хөндийрч эхлэхэд WWE-ийн бүтээгдэхүүнд тодорхой уналт ажиглагдсан гэж Тёрстон хэлжээ. Зарим шинжээчийн үзэж байгаагаар түүний оролцоо WWE-ийн үзэлтийн бууралтыг удаашруулж байсан бөгөөд Raw нэвтрүүлгийн дундаж үзэлт 2010-2015 оны хооронд нэг саяар буурсан байна.
Жинхэнэ, үнэнч дүр
Маркетингийн судлаач доктор Жиллиан Бруксын хэлснээр, Сина зүгээр л барилдаад явах боломжтой байсан ч, харин тэр бодит, итгэл төрүүлсэн хувийн брэндийг бүтээжээ.
Тэрээр арьсны хорт хавдрын толбо илэрснээ олон нийтэд илчилсний дараа Neutrogena-гийн нарны тосны кампанит ажлын нүүр царай болсон.
Мөн Make-A-Wish сангаар дамжуулан 650-аас дээш хүүхдийн хүслийг биелүүлснээрээ Гиннесийн дээд амжилт тогтоосон. Тэр үүнийг “тохиолдлоор эхэлсэн ч, амьдралын минь хамгийн гайхалтай зүйл” гэж тодорхойлдог.
