Тарифын дарамт автомашины салбарын ашгийг шахаж эхэллээ
5-р сарын 8-ны өдөр санхүүгийн жилийн тайлангаа танилцуулах үеэр Японы автомашин үйлдвэрлэгч Toyota компани АНУ-ын шинэ импортын тарифууд 4, 5-р сард л гэхэд тус компанид 180 тэрбум иен (~1.3 тэрбум ам.доллар)-ын зардал үүсгэнэ гэж тооцож байгаагаа мэдэгдлээ. Энэ нь 2025-2026 оны санхүүгийн жилийн 21%-ийн ашгийн бууралт-ыг улам хүндрүүлэх хандлагатай байна.
Ford, General Motors, Stellantis зэрэг компаниудаас ялгаатай нь Toyota-ийн санхүүгийн жил нь 4-р сард эхэлдэг. 2025 оны бүтэн жилийн санхүүгийн тайланд дурдсанаар, 4 ба 5-р сарын тарифын нөлөөг анхан шатны байдлаар 2025-2026 оны тооцоонд тусгасан ч нөхцөл байдал одоо ч тодорхой бус байна. CEO Коджи Сато ч үүнийг хэвлэл, олон нийтийн өмнө онцлон дурдсан юм.
“Тарифын хувьд одоогоор бүх зүйл маш их хувирамтгай байгаа тул нөлөөг нь хэмжих эсвэл тодорхой алхам авахад хүндрэлтэй байна” гэж Сато мэдэгдлээ.
CFO: Тохирсон үед “Зохих арга хэмжээ” авч магадгүй
Тарифын нөлөө ойрын хугацаанд Toyota-ийн ашгийн үзүүлэлтэд хүнд дарамт болох төлөвтэй байна. Тоон утгаар авч үзвэл, 2026 оны 3-р сарын 31-нд дуусах санхүүгийн жилд компанийн үйл ажиллагааны ашиг 21%-иар унаж, 3.8 их наяд иен (~25.4 тэрбум ам.доллар) болж буурна. Мөн ашигт ажиллагааны хувь 2025 оны 3-р сард дууссан жилд 10% байсан бол ирэх жилийн эцэс гэхэд 7.8% болж буурахаар тооцоолж байна.
Гэсэн ч Toyota-ийн санхүүгийн захирал Ёичи Миязаки худалдан авалтын эрэлт өндөр хэвээр байгааг онцлон, Хойд Америк, Европ, Япон зэрэг гол зах зээлүүд дэх нөөц, эрэлт хоёр тарифын нөлөөг тодорхой хэмжээгээр саармагжуулж чадна гэж үзэж байна. Одоогоор Toyota-ийн дилерүүд дунджаар 10 хоногийн нөөцтэй, харин hybrid машинууд 6 хоног тутамд шинэчлэгдэж байна. Иймд тэрээр үнэд тохируулга хийх боломж байна гэж дүгнэв.
“Бодит эрэлт маш өндөр байгаа. Өмнө нь ч бид эрэлт өндөр үед үнийг нэмэгдүүлж байсан. Тиймээс нөхцөл байдлыг анхааралтай ажиглаж, тохирсон цаг үед зохих арга хэмжээ авна” гэж Миязаки Токиод болсон тайлангийн үеэр хэллээ.
Тарифын дарамтаас гадна бусад хүнд сорилтууд ч бий
Ford, GM зэрэг автомашин үйлдвэрлэгчид саяхан нэг тэрбум гаруй долларын алдагдал хүлээнэ гэдгээ зарласан. Ford энэ долоо хоногт жилийн төлөвлөгөөгөө хүчингүй болгож, тарифаас болж 1.5 тэрбум ам.долларын алдагдал хүлээнэ гэж мэдэгдсэн бол General Motors өөрийгөө 5 тэрбум ам.долларын тарифын эрсдэлд байгааг онцолсон.
Гэхдээ Toyota-ийн хувьд тариф бол санхүүгийн дарамтын зөвхөн нэг хэсэг. Тус компани мөн валютын ханшийн хэлбэлзлээс 745 тэрбум иен (~5 тэрбум ам.доллар), түүхий эдийн үнийн өсөлтөөс 350 тэрбум иен (~2.3 тэрбум ам.доллар) алдах төлөвтэй. Үүний зэрэгцээ цэвэр ашиг 35%-иар буурах тооцоотой байна. Мөн 3-р сарын 31-нд дууссан улирал нь ашиг буурсан дараалсан хоёр дахь улирал болжээ — 1-р сараас 3-р сар хүртэл 10%-ийн бууралт, өмнөх улиралд 28%-ийн уналт бүртгэгдсэн.
Дүгнээд хэлэхэд:
Зарим бүтээгдэхүүн борлуулалт сайтай байхад Toyota-ийн санхүүгийн захирал тарифын дарамтад “Зохих арга хэмжээ” авч магадгүй гэж хэлсэн нь нууцлаг сонсогдож магадгүй ч, өнөөгийн зах зээлийн нөхцөл байдалд үүнийг бүрэн ойлгож болохоор байна.
Toyota нь Япон үйлдвэрлэгчдийн дундаас АНУ-д хамгийн их үйлдвэрлэлийн баазтай компани бөгөөд Toyota болон Lexus брэндийн олон эд анги, автомашин АНУ-д дотооддоо угсрагддаг. Гэсэн хэдий ч энэхүү нөхцөл байдал нь бүр “Америкжсан” компаниуд хүртэл тарифын нөлөөнд өртөж байгааг харуулж байна.
autoblog.com
