Парис Сен-Жерменийн дасгалжуулагч Луис Энрике өөрийн багийг дэлхийн хамгийн шилдэг бүрэлдэхүүнтэй хэмээн онцолж, Астон Виллаг нийлбэр дүнгээр хожсоноор Аваргуудын лигийн хагас шигшээд шалгарснаа баяртайгаар мэдэгдлээ.
ПСЖ өнгөрсөн Лхагва гарагт “Парк де Прэнс” цэнгэлдэх хүрээлэнд болсон эхний тоглолтод 3:1 харьцаагаар хожсон учир хариу тоглолтод илт давуу байдалтай орсон.
Харин тоглолтын эхний 27 минутын дотор Ашраф Хакими, Нуно Мендеш нарын гоолоор 2:0-ээр тэргүүлж эхлэхэд Вилла баг нэмэлт цагт оруулахын тулд дор хаяж дөрвөн гоол оруулах шаардлагатай болсон.
Гэвч 34 дэх минутад Юри Тилемансийн цохилт хамгаалагч Виллиан Пачод шүргэж орсноор Виллад найдвар төрүүлэв. Харин хоёрдугаар үе эхлээд 10 минутын дараа Жон МакГиннийн алсаас хийсэн цохилтыг мөн л Пачо санамсаргүй байдлаар оруулж, зөрүүг 2:2 болголоо.
Удалгүй Езри Конса ойроос гоолдож, Виллаг эргэн ирэлтийн ирмэгт аваачив.
Гэвч Вилла Паркын дүүрэн үзэгчдийн хүссэн дөрөв дэх гоол орсонгүй. Жанлуижи Доннарумма хэд хэдэн гайхалтай хаалт хийж, нэмэлт цагийн сүүлчийн мөчид Пачо Иан Маастений орох нь тодорхой байсан цохилтыг хааснаар ПСЖ-ийн хагас шигшээд шалгарах хувь заяаг баталгаажууллаа.
Тоглолтын дараа Prime Video Sport-д ярилцлага өгөх үеэр түүнийг “Доннарумма бол дэлхийн хамгийн шилдэг хаалгач уу?” хэмээн асуухад Луис Энрике хариуд нь:
“Зөвхөн хаалгач төдийгүй, би дэлхийн хамгийн шилдэг бүрэлдэхүүнийг удирдаж байна гэж боддог. ПСЖ шиг багт маш олон чадварлаг тоглогч бий. Энэ бол хөлбөмбөг, энэ бол өрсөлдөөн” хэмээн хариулжээ.
Энэхүү мэдэгдэл нь өнгөрсөн жил Килиан Мбаппе Реал Мадрид руу явсан ч гэсэн ПСЖ-ийг хэт дөвийлгөсөн мэт санагдаж болох ч тэд сүүлийн 16-д Ливерпүүлийг хожсон, дотоодын тэмцээнд ялагдал хүлээгээгүй байгаа зэрэг нь Луис Энрикегийн өөртөө итгэх шалтгаан юм.
Тэрээр баг нь Астон Виллагийн эсрэг ийм нөхцөлд тоглосноор илүү туршлагажиж, улам хүчирхэг болно гэж үзэж байна.
“Энэ тоглолт бидэнд өсөн дэвжих, илүү сайн өрсөлдөх боломж олголоо. Астон Вилла хоёрдугаар үед маш эрчтэй тоглосон. Гэхдээ бид тоглолтыг гайхалтай эхлүүлсэн, хоёр сайхан гоол оруулсан. Миний бодлоор хоёр тоглолтын нийлбэр дүнгээр бид ялалт авах бүрэн эрхтэй байсан.”
ПСЖ хагас шигшээд Арсенал болон Реал Мадридын хожсон багтай тоглоно. Арсенал эхний тоглолтод 3:0 харьцаагаар илт давуу хожоод байгаа бөгөөд Мбаппе болон түүний шинэ баг Мадрид Сантьяго Бернабеуд эргэн ирэлт хийхийн төлөө сүүлийн боломжоо ашиглахаар зорьж байна.
101greatgoals.com
