Каннабисын утаа тамхины утаанаас зөөлөн мэт санагддаг ч энэ нь төөрөгдөл байж болзошгүй. Сүүлийн үеийн судалгаануудын дүнгээр каннабисын утаа уушгинд гүн нэвтэрч, хорт бодисууд болон дархлааны системд сөргөөр нөлөөлөх эрсдэлтэй болохыг харуулж байна.
Зарим судалгаагаар каннабисыг удаан хугацаанд, их хэмжээгээр хэрэглэх нь толгой, хүзүүний хавдар зэрэг хорт хавдрын тодорхой төрлийн эрсдэлийг нэмэгдүүлдэг болохыг онцолжээ. Гэвч энэ холбоо хэр зэрэг шууд бөгөөд хүчтэй болох нь одоогоор бүрэн тодорхой биш байна.
Каннабисын утааны найрлага
Каннабисын утаанд THC (тетрагидроканнабинол), нарийн ширхэгт тоосонцор, мөн тамхинд агуулагддаг зарим хорт бодисууд байдаг. Эдгээр нь уушгинд үрэвсэл үүсгэхээс гадна дархлааны эсүүдийн үйл ажиллагааг өөрчлөх нөлөө үзүүлдэг.
Калифорнийн Их Сургуулийн судлаач Рафаэль Куомогийн тайлбарласнаар уушгины хамгаалалтын бүрхүүл сулрах, вирусын эсрэг дохио буурах, үрэвсэл нэмэгдэх үзэгдэл ажиглагддаг. Нэгэн судалгаагаар каннабисын утаа хавдрын эсрэг болон халдварын эсрэг хамгаалалтыг сулруулдаг болохыг тогтоосон. Мөн THC нь дархлаа эмчилгээг сааруулж, хавдрын эсрэг дархлааны хариу үйлдлийг суларуулдаг байна.
Дархлаа ба уурагт өөрчлөлт
Каннабис хэрэглэснээр уушгинд үрэвсэлтэй холбоотой уураг ихсэж, MUC5AC гэх уураг хэт ихээр бий болдог нь эдийн гэмтэлд хүргэж болзошгүй. Мөн уушгийг хамгаалах зарим ферментийн үйл ажиллагаа өөрчлөгдөж, хорт бодист хариу үзүүлэх чадамж буурдаг.
Судалгаагаар уушгины макрофагуудын (дархлааны эсүүд) хариу үйлдэл суларч, цусанд цитокин гэх дохио дамжуулагч бодисууд өөрчлөгдөж буй нь молекулын түвшинд каннабисын нөлөөг харуулж байна.
Хорт хавдартай холбоотой өөрчлөлт
Каннабисын утаа эсийн доторх молекулын “унтраалгууд”-д нөлөөлж, хорт хавдар үүсэхэд нөлөөлөх магадлалтай. Үүний жишээ нь EGFR (эпидермал өсөлтийн факторын рецептор) юм. Судлаач Саянтан Бхаттачарьягийн 83 эрэгтэйд хийсэн судалгаагаар каннабис хэрэглэгчдийн EGFR болон хавдартай холбоотой уургуудын идэвхжил тамхи татдаг болон татдаггүй хүмүүсээс өндөр байжээ.
Тэрээр ирээдүйд каннабис EGFR-ийг хэрхэн идэвхжүүлдгийг нарийвчлан тогтоохын тулд лабораторийн бодит загвар хөгжүүлэх шаардлагатай гэж үзэж байна. Мөн зах зээл дээрх зохицуулалтгүй каннабисын бүтээгдэхүүнд агуулагдах нэмэлт бодисууд нь нэмэлт эрсдэл үүсгэж болзошгүйг анхааруулжээ.
Холимог дүн ба “Куомогийн парадокс”
Бодит амьдрал дээрх хэрэглэгчдийн судалгааны дүн тодорхой бус хэвээр байна. Зарим нь каннабисыг их хэмжээгээр хэрэглэх нь хорт хавдрын эрсдэлийг нэмэгдүүлнэ гэж үздэг бол, зарим судалгаанд тодорхой холбоо илрээгүй.
Гэсэн ч Куомо урт хугацаанд тогтмол хэрэглэх нь хорт хавдар үүсэх магадлалыг нэмэгдүүлж болзошгүй гэж анхааруулдаг. Сонирхолтой нь, хорт хавдартай хүмүүст каннабис хэрэглэх нь нас баралтыг нэмэгдүүлдэггүйг түүний судалгаа харуулсан бөгөөд энэ үзэгдлийг “Куомогийн парадокс” гэж нэрлэжээ. Түүнчлэн каннабис нь хорт хавдрын өвчтөнүүдийн хоолны дуршлыг нэмэгдүүлж, хими эмчилгээний үед дотор муухайрахыг бууруулах эерэг талтай болох нь тогтоогдсон.
Дүгнэлт
Каннабисын утаа уушгийг цочроож, дархлааны үйл ажиллагаанд нөлөөлөх нь олон судалгаагаар тогтоогдсон. Гэвч хорт хавдартай шууд холбоотой эсэх нь одоогоор бүрэн батлагдаагүй хэвээр байна.
Ирээдүйд каннабисын ашиг тус, эрсдлийг бодитойгоор үнэлэхийн тулд илүү өргөн хүрээтэй, урт хугацааны судалгаа зайлшгүй шаардлагатай байна.
Эх сурвалж:
