YouTube энэ оны дунд хугацааны сонгуулийн өмнө улс төрчид, сэтгүүлчдэд зориулсан хиймэл оюун ухааны гүн гажуудлын (deepfake) дүрс таних хэрэгслийг өргөжүүлж, тэдгээрийг хууль бус видеонуудыг устгуулахад хялбар болгожээ. Гэвч одоогоор хэнд ямар эрх олгосон талаар нууцалж байна.
Энэхүү систем нь хэрэглэгчийн дүр төрхийг AI контентод ашигласан видеог илрүүлж, зөвшөөрөлгүй бичлэгийг устгуулах хүсэлт гаргах боломж олгодог. YouTube-гийн удирдлагууд хиймэл оюун ухааны агуулга улам хөгжиж буй тул иргэдийн дүр төрхийг хамгаалах хэрэгсэл шаардлагатай гэж үзжээ.
Гүн гажуудлын технологи сайжирч, сонгуулийн үеэр буруу мэдээлэл тараах эрсдэл нэмэгдэж буй тул YouTube энэ хэрэгслийг өнгөрсөн жил алдартнууд, тамирчид, дараа нь платформын бүтээлчдэд нэвтрүүлсэн. Одоогоор уг системд бүртгүүлэхэд хэрэглэгчид видео селфи болон төрийн үнэмлэхээр өөрийгөө баталгаажуулах шаардлагатай бөгөөд өгөгдлийг зөвхөн баталгаажуулалтанд ашиглахыг амлажээ.
YouTube энэ хэрэгслийг олон улсын хэмжээнд өргөжүүлэхээр төлөвлөж байгаа ч эхний шатанд ямар улс төрчид, сэтгүүлчид хамрагдсан талаар мэдээлэл өгөөгүй байна. Түүнчлэн АНУ-ын Ерөнхийлөгч Доналд Трамп болон түүний багийнханд уг хэрэгсэлд хандах эрх олгогдсон эсэх нь тодорхойгүй байна. Трампын баг хиймэл оюун ухаанаар бүтээгдсэн дүрсийг өрсөлдөгчдөө эсэргүүцэхэд ашиглаж ирсэн билээ.
