Nvidia компани 2027 он хүртэл Blackwell, Vera Rubin платформуудаас 1 их наяд ам.долларын орлого олох төлөвтэй гэж гүйцэтгэх захирал Жэнсэн Хуанг Калифорнид болсон жил тутмын GPU технологийн бага хурал дээр мэдэгдэв. Энэ нь өмнөх жилийн 2026 он хүртэлх 500 тэрбум ам.долларын төсөөллөөс 2 дахин өссөн үзүүлэлт юм.
Хуангийн үзэж байгаагаар агентлаг хиймэл оюун ухааны (agentic AI) эрэлт огцом өсөх бөгөөд үүний улмаас inference буюу дүгнэлт гаргах процессийн ач холбогдол сургалт (training)-аас давж хөгжих юм. Түүний онцолсноор Anthropic компанийн Claude Code AI агент нь програм хангамжийн инженерчлэлд хувьсгал хийж, Nvidia-ийн бүх программистууд AI агентуудаар туслуулж байна.
Тэрбээр агентлаг AI-г шинэ компьютер гэж тодорхойлж, бүх SaaS компаниуд агентлаг үйлчилгээ (AgaaS) болж хувирахыг таамаглажээ. Nvidia өнгөрсөн сард Groq компанийг худалдан авч, inference-д чиглэсэн чип үйлдвэрлэлээ өргөжүүлсэн бөгөөд энэ жил хоёрдугаар хагаст анхны Groq чипүүдээ гаргана.
Мөн Nvidia OpenClaw нэртэй нээлттэй эхийн агентлаг AI программтай хамтран ажиллахыг зарлав. OpenClaw нь агентлаг компьютерийн үйлдлийн системийн үүрэг гүйцэтгэх бөгөөд Хуангын хэлснээр Windows-ийн үүргийг гүйцэтгэхтэй адил юм. Гэхдээ OpenClaw нь компьютер болон файлууд руу бүрэн нэвтрэх шаардлагатай тул кибер аюулгүй байдлын эрсдэл үүсгэж, томоохон компаниуд болон Хятадын засгийн газар үүнийг ашиглахыг хориглож байгаа юм.
Эдгээр эрсдэлд хариу болгож Nvidia NemoClaw нэртэй илүү аюулгүй, хувийн орчинд тохирсон хувилбарыг танилцууллаа. Тус компани нээлттэй эхийн загваруудыг хөгжүүлэх замаар өөрийн техник хангамжийн хэрэглээг дэлхий дахинд өргөжүүлэх бодлого баримталж байна.
Нэмэлтээр Nvidia шинэ Vera Rubin компьютерийг сансарт суурилсан хиймэл оюун ухааны дата төвүүдэд ашиглах бөгөөд Hyundai, Nissan, BYD, Geely зэрэг автомашин үйлдвэрлэгчидтэй хамтран жилд 18 сая роботакси үйлдвэрлэхээр төлөвлөж байна.
Санхүүгийн зах зээлд хиймэл оюун ухаанд зориулсан их хэмжээний хөрөнгө оруулалтад эргэлзэх хандлага нэмэгдэж, Nvidia-ийн хувьцаа сүүлийн үед тогтворгүй байдалтай байна. Гүйцэтгэх захирал Хуанг агентлаг AI-д итгэлтэй хэвээр байгаа ч зах зээлийн хүлээлтэд ихээхэн өөрчлөлт гараагүй байна.
