Английн топ клубүүд Боурнмутын хагас хамгаалагчийг авах төлөвлөгөөтэй байна.
Ливерпүүл, Челси, Манчестер Юнайтед клубүүд Боурнмутын гол тоглогч Тайлер Адамсыг авах сонирхолтой байгаа талаар мэдээлэл гарчээ. Ливерпүүл өнгөрсөн улиралд Арне Слотын удирдлага дор Премьер лигийн аварга болсон ч энэ улиралд тоглолтын тогтворгүй байдалтай, одоогоор лигийн зургаа дахь байрт бичигдэж байна. Мөн Аваргуудын лигийн 1/16 шигшээд Галатасарайд 1:0-ээр хожигдсон нь клубийн байдалд хүндрэл учруулжээ.
Тиймээс Ливерпүүл зуны шилжилтийн цонхонд багийнхаа төвийг бэхжүүлэхээр төлөвлөж байгаа бөгөөд сүүлийн үеийн гайхалтай тоглолтуудыг нь харгалзан Тайлер Адамсыг гол зорилгоо болгожээ. Харин Челси болон Манчестер Юнайтед ч мөн түүнтэй өрсөлдөж байгаа бөгөөд Челси дунд шугамыг бэхжүүлэх урт хугацааны төлөвлөгөөтэй, Манчестер Юнайтед нь эрч хүчтэй, тэсвэр тэвчээртэй тоглогч хайж байна.
27 настай Адамсын гэрээ 2028 он хүртэл хүчинтэй бөгөөд Боурнмут түүнийг ойролцоогоор 30 сая фунт стерлингийн үнээр зарахад бэлэн байна. Гэсэн хэдий ч сүүлийн жилүүдэд бэртэл гэмтэлтэй тул түүний бэлтгэл, биеийн байдалд анхаарал хандуулж, ДАШТ дууссаны дараа л клубүүд албан ёсоор санал тавихаар төлөвлөж байна. Адамс хамгаалалтын хагас хамгаалагчаар голлон тоглодог ч бүх талбайг хамарсан үүрэг гүйцэтгэж чаддаг, хурдан, хүчтэй, хамгаалалтын үүрэгтээ үр дүнтэй тоглогч юм.
