Ирландын боксчин Адам Оланиян богино хугацаанд өрсөлдөгчөө буулган авч, мэргэжлийн анхны ялалтаа байгууллаа.
Мэргэжлийн боксын хамгийн нөлөө бүхий хүнд жингийн боксчдын багийг бүрдүүлдэг Фрэнк Уоррен Ирландын шинэ авьяаст боксчин Адам Оланинянтай гэрээ байгуулснаа зарлалаа. Оланиян нь долоон удаагийн үндэсний аварга бөгөөд 2028 оны Олимпын наадамд оролцохоор бэлдэж байсан ч мэргэжлийн боксын зам сонгосон юм. Түүний эцэг Жорж Оланиян нь Нигерийн армийн боксчин байсан бөгөөд Ирландад суурьшсаны дараа Дъблин хотод төрсөн Адам Оланиян сонирхогчдын рингэнд өөрийн нэрээ гаргаж, Европын аварга шалгаруулах тэмцээнд дараалан түрүүлж, 2024 оны 19 хүртэлх насны анхны Дэлхийн аварга шалгаруулах тэмцээний алтан медалийг хүртсэн билээ.
Өнгөрсөн бямба гарагт болсон Жазза Дикенс болон Энтони Какаце нарын тулааны дэмжих тулаанд Оланиян мэргэжлийн анхны тулаанаа хийж, Чехийн боксчин Ян Безоушкаг нэг минутаас бага хугацаанд нокаутаар буулган авч, хүнд жингийн ангилалд анхаарал татсан эхлэлийг тавьлаа.
iFL TV-д өгсөн ярилцлагадаа Уоррен хэлэхдээ, түүний зорилго нь Оланинянийг Ирландын боксын түүхэн дэх анхны хүнд жингийн дэлхийн аварга болгох явдал юм. Тэрээр “Энэ бол түүний анхны тулаан байсан бөгөөд тэр амжилттай оролцсон. Түүний өрсөлдөгчид цаг хугацаа өнгөрөх тусам улам ширүүн болно. Тэр Ирландын анхны хүнд жингийн дэлхийн аварга болох замд орсон. Бид үүнийг бодит болгохын тулд ажиллах болно. Тэр хүнд жингийн ангилалд үнэхээр сонирхолтой нэмэлт болсон нь тодорхой” гэж онцолсон байна.
Өнөөг хүртэл хоёр Ирланд боксчин нэр хүндтэй хүнд жингийн дэлхийн аваргын төлөө тулалдаж байсан ч сүүлийн зуун гаруй жилийн хугацаанд ийм явдал болоогүй байна. 1899 онд Том Шарки Жеймс Ж.Жеффрис-тэй 25 раунд тулалдсан ч ялагдсан бол 1908 онд Жим Рош Томми Бернстэй хийсэн эхний раунддаа нокаутаар ялагдсан түүхтэй.
