АНУ-ын Төрийн сангийн яам Ираны газрын тосны худалдаа, тээвэрлэлт, буулгалтын эсрэг тогтоосон удаан хугацааны хоригуудыг нэг сараар түр хугацаагаар цуцлах шийдвэр гаргалаа. Энэ нь дэлхий дахинд газрын тосны үнийн огцом өсөлтийг бууруулах зорилготой юм.
Энэхүү “Ерөнхий зөвшөөрөл”-ийн дагуу Иран болон Оросын газрын тосыг аль хэдийнэ ачсан, тэр ч байтугай хоригт өртсөн хөлөг онгоцуудаас худалдан авах боломжтой болж байна. Уг шийдвэр нь Украины дайн болон Ираны “муу үйлдлүүд”-ийн хариуд хэдэн жилийн өмнөөс тогтоосон 10 гаруй төрлийн хоригийг хэсэгчлэн хүчингүй болгож байгаа юм.
Төрийн сангийн нарийн бичгийн дарга Скотт Бессент энэ арга хэмжээг “маш нарийн зохион байгуулалттай, богино хугацааны зөвшөөрөл” хэмээн тайлбарлаж, далайд “гацсан” Ираны газрын тосыг зах зээлд нийлүүлснээр дэлхийн эрчим хүчний нийлүүлэлтийг нэмэгдүүлж, үнийн дарамтыг бууруулна гэжээ. Тэрээр энэхүү арга хэмжээ нь Ираны эсрэг “Operation Epic Fury” ажиллагааны хүрээнд үнийг тогтворжуулахад тус болно гэв.
АНУ-ын энэхүү шийдвэр нь сүүлийн үед Ойрхи Дорнодод эрчим хүчний байгууламжууд руу чиглэсэн халдлагуудаас үүдэлтэй дэлхийн зах зээл дэх хямралыг даван туулах зорилготой байна. Ираны довтолгооны хариуд Brent төрлийн газрын тосны үнэ нэг баррель нь 119 ам. долларт хүрээд байсан бөгөөд Европын хийн үнэ 35 хувиар өссөн байна. Хоригийг цуцлах хугацаа нь 4-р сарын 19-нд дуусах бөгөөд Төрийн сангийн яам дахин сунгахгүй бол хоригууд дахин үйлчилнэ.
АНУ-ын Ерөнхийлөгч Дональд Трамп Хомейнийн хоолойг хамгаалах асуудалд НАТО болон бусад холбоотнуудын идэвхгүй байдлыг шүүмжилж байсан билээ. Тэрээр АНУ нь цэвэр газрын тосны экспортлогч улс тул энэ асуудалд шууд хамааралгүй гэж үзэж байгаа ч дэлхийн зах зээлд учирч буй үнийн өсөлтийг бууруулах зорилгоор энэхүү шийдвэрийг гаргасан байна. Гэсэн хэдий ч АНУ Ойрхи Дорнодод цэргээ нэмж байрлуулах болон батлан хамгаалах салбарт нэмэлт 200 тэрбум ам.долларын төсөв хөөцөлдөж байгаа нь нөхцөл байдлын эмзэг байдлыг харуулж байна.
