БИЧ компанийн үүсгэн байгуулагчийн ач хүү нар хорин жилийн өмнө хулгайд алдсан хэмээх 15-р зууны үеийн нэрт зураач Фра Анжеликогийн бүтээлийг эргүүлэн авахаар шүүхэд ханджээ. Уг уран бүтээлийг хууль бус аргаар борлуулж, улмаар 5.4 сая ам. доллараар худалдан авсан Өмнөд Америкийн тэрбумтан буцааж өгөхөөс татгалзсан байна.
Уг хэргийн гол нь 1454 оны орчимд бүтээгдсэн “Гэгээн Сикстус” хэмээх тус бүтээл юм. Фра Анжелико нь Флоренцийн Ренессансын үеийн нэрт зураач байсан бөгөөд уг бүтээл нь түүний сүүлчийн уран бүтээлүүдийн нэгт тооцогддог. БИЧ хэмээх нэрээрээ алдаршсан бөмбөлөгт үзэг, нэг удаагийн хутга, асаагуур үйлдвэрлэдэг компанийн гүйцэтгэх захирал асан Марсель БИЧ 1972 онд уг бүтээлийг 130,000 фунт стерлингээр худалдан авч байжээ.
Марсель БИЧ-ийн гэрээслэл ёсоор уг бүтээл нь түүний хүү Брунод шилжиж, улмаар Бруно нь өөрийн гурван хүү болох Гонзалв, Чарльз, Гийом нарт гэрээслэлээрээ үлдээсэн байна. 2006 онд уг бүтээл нь Бруно БИЧ-ийн Нью-Йорк дахь байрнаас алга болсон бөгөөд гэр бүлийн жолооч Рой Морроу хулгайлсан байж болзошгүй гэж үзэж байна. Жолооч нь нас барсан тул хэргийг шалгах боломжгүй болсон байна.
Улмаар уг бүтээл нь урлагийн дилер Ричард Фейгенээр дамжин, 2018 онд Christie’s дуудлага худалдаагаар Колумбын аж үйлдвэрч эрчүүд болох Альваро Саиех болон түүний эхнэрт 5.4 сая ам. доллараар зарагджээ. БИЧ-ийн гэр бүл 2023 онд уг бүтээлийн байршлыг олж мэдээд Саиехээс буцааж өгөхийг шаардсан боловч тэд татгалзсан байна. Одоо БИЧ-ийн гурван хүү уг бүтээлийг эргүүлэн авах, мөн борлуулалтаас олсон ашгийг нэхэмжилж шүүхэд хандаад байна.
