Оливер МакКолл Майк Тайсоны дээд амжилтыг ойртжээ.
Хуучин хүнд жингийн дэлхийн аварга Майк Тайсон боксын замналынхаа туршид олон дэлхийн дээд амжилтыг тогтоож байсан билээ. Түүний нэгэн амжилтыг ойрын үед нэгэн боксчин давтах төлөвтэй байна. Тухайлбал, Жэк Жонсоны тогтоосон хүнд жингийн дэлхийн аваргын хамгийн урт хугацаагаар тулалдаж байсан амжилтыг Рой Жонс Жр таван жилийн завсарлагаанаа таслан UFC-ийн од Энтони Петтистэй хийсэн тулаанаараа 33 жил (12,384 хоног) орчим хугацаагаар шинэчлэн тогтоожээ. Гэвч түүний энэ амжилт дараа жил нь Майк Тайсоны Жэйк Полтой хийсэн маргаантай эргэн ирсэн тулаанаар 14,499 хоног буюу бараг 40 жил болж ахисан юм.
Үүнтэй зэрэгцэн, хуучин WBC-ийн хүнд жингийн аварга Оливер МакКолл 2024 оны арваннэгдүгээр сараас хойш гурван удаагийн тулаанд оролцож, хоёр ялалт (нокаутаар) болон нэг тэнцээг байгуулжээ. Одоогийн байдлаар МакКоллын 1985 оны арваннэгдүгээр сард эхэлсэн бөгөөд 2025 оны зургаадугаар сар хүртэл үргэлжилж буй мэргэжлийн замнал нь нийт 14,458 хоног болж, Тайсоны амжилтаас ердөө 41 хоногийн зайтай байна.
“The Atomic Bull” хочит Оливер МакКолл 2026 онд рингэнд эргэн ирнэ гэдгийг түүний сүүлийн тулааныг зохион байгуулж буй Country Box компанийн төлөөлөгч Жимми Адамс “World Boxing News” сэтгүүлд ярилцлага өгөхдөө баталжээ. Тэрбээр “Тэр дахин тулалдах гэж байна. Үнэхээр Оливер надад хувиараа залгаж, дахин тулалдахыг хүссэн. Би Country Box-оор удахгүй түүнд тов гаргаж өгөхөөр ажиллаж байна” гэжээ.
Цаашид хийх аливаа нэгэн тулаан нь Оливер МакКоллыг хүнд жингийн дэлхийн аваргын хамгийн урт хугацаагаар мэргэжлийн тулалдаж буй боксчин гэсэн шинэ дээд амжилтын эзэн болгоно. Гэсэн хэдий ч Майк Тайсоны дахин нэгэн тулаанд оролцох магадлалыг үгүйсгэх аргагүй юм. Түүний Флой Маиведертай хийх үзүүлэх тоглолт ирэх сард болохоор төлөвлөгдсөн байна.
