Тулааны урлагийн нэвтэрхий толь, алдарт жүжигчин Чак Норрис өөрийн ч мэдэлгүй эцэг нь болсон байсан охинтойгоо хэдэн арван жилийн дараа уулзсан сонирхолтой түүхээсээ хуваалцжээ.
1962 онд Солонгост алба хааж байсан залуу цэрэг Чак Норрис нэгэн бүсгүйтэй богино хугацааны харилцаатай байсан бөгөөд энэ нь бараг 30-аад жилийн турш нууц хэвээр үлдсэн байна. Тэрээр тухайн үед бүсгүйг жирэмсэн болсныг мэдээгүй өнгөрсөн бөгөөд түүнээс охин төрсөн гэдгийг ч төсөөлөөгүй явжээ.
2004 онд “Entertainment Tonight” нэвтрүүлэгт өгсөн ярилцлагадаа Норрис “Би гэртээ ирээд захидлуудаа шалгаж байтал Дина гэх бүсгүйгээс ирсэн нэгэн захидал анхаарал татсан. Тэр захидалдаа ‘Би таны өмнөх харилцаанаас төрсөн охин чинь байна’ гэж бичсэн байсан” хэмээн дурсжээ. Дина 1964 онд төрсөн бөгөөд Чакийг анхны эхнэр Дианна Холечектэйгээ гэр бүлтэй байх үед тохиосон харилцаанаас мэндэлсэн байна. Дина 16 настайдаа Чак Норрисыг өөрийн биологийн эцэг гэдгийг мэдсэн ч ээж нь жүжигчний гэр бүлийн амьдралыг хүндэтгэн энэ нууцыг олон жил хадгалсаар иржээ.
Эцэст нь тэд Чак Норрисын ээжийн гэрт анх удаа уулзах үед жүжигчин маш их гайхширсан байна. Тэрээр 2004 онд хэвлэгдсэн “Against All Odds: My Story” хэмээх намтар номдоо “Би зочны өрөөнд орж ирээд бараг амьсгалж чадахгүй болох шиг болсон. Миний өмнө нэгэн үзэсгэлэнтэй залуу бүсгүй зогсож байлаа. Түүнийг харах агшинд л миний охин мөн гэдгийг зөнгөөрөө мэдэрсэн. Надад ДНХ-ийн шинжилгээ хийлгэх ямар ч шаардлага байгаагүй, тэр миний охин гэдэгт эргэлзэх зүйлгүй байв” хэмээн бичжээ. Тэрээр охиноо тэврээд уйлж, “Би түүнийг насаараа мэддэг байсан мэт дотно санагдсан” гэж дурссан байдаг.
Өдгөө 62 настай Дина эцэгтэйгээ уулзсанаас хойш олны анхаарлаас хол байхыг эрмэлзсээр ирсэн. Чак Норрис охиноо өөрийн хүү Майк, Эрик нарын хамт гэр бүлдээ халуун дулаанаар хүлээн авсан юм. Тэрээр сүүлийн жилүүдэд охиныхоо талаар үргэлж бахархан ярьдаг бөгөөд тэдний анхны уулзалтыг амьдралынх нь хамгийн нандин мөчүүдийн нэг хэмээн тодорхойлдог байна.
