Хүнд жингийн нэрт тулаанч Тайсон Фьюри өөрийн эртний өрсөлдөгч Энтони Жошуагийн шинэ дасгалжуулагчийн багт Олександар Усик нэгдсэн талаар болон тэдний хооронд хүлээгдэж буй тулааны талаар өөрийн байр сууриа илэн далангүй илэрхийллээ.
Жошуа хамгийн сүүлд өнгөрсөн арванхоёрдугаар сард Жэйк Полтой тулалдаж, зургаадугаар раундад нокаутаар ялалт байгуулсан билээ. Энэ нь түүний хувьд 2024 оны есдүгээр сард Даниел Дюбуатай хийсэн тулаанд хүнд ялагдал хүлээснээс хойшхи анхны ялалт байв. Гэвч энэ оны эхээр Жошуа харамсалтай авто осолд орж, ойр дотны хоёр найзаа алдсан эмгэнэлт явдал тохиолдсон юм. Энэхүү хүнд үеийн дараа түүнийг спортоо орхино гэх таамаг байсан ч Жошуа Усиктай хамтран бэлтгэл хийж эхэлснээр рингэнд эргэн ирэх нь тодорхой болсон.
Промоутер Эдди Хирн түүнийг энэ зун эргэн ирж, улмаар Фьюритэй тулалдах боломжтой гэж үзэж байна. Фьюригийн хувьд 2024 оноос хойш рингэнд гараагүй бөгөөд Усиктэй хоёр удаа тулалдаж, онооны зөрүүгээр ялагдал хүлээсэн ч ирэх дөрөвдүгээр сарын 11-нд Тоттенхэм Хотспур цэнгэлдэх хүрээлэнд Арсланбек Махмудовтой тулалдахаар бэлтгэлээ базааж байна.
Фьюри “Sky Sports”-т өгсөн ярилцлагадаа Жошуагийн шинэ хамтрагчийн талаар ийнхүү ярьжээ: “Хэрэв тулаан хийх боломжтой бол хийцгээе. Эхлээд Махмудовыг ялчихаад бэлэн болно. Жошуаг бэлтгэлийн лагертаа эргэн ирснийг харах таатай байна. Тэр маш хүнд үеийг туулсан тул би түүнд хувийн орон зай олгохыг хүсэж байна. Гэхдээ Усик түүнд туслах нь надад огт хамаагүй, энэ нь түүнд тус болохгүй. Би Усикын толгойг цохиж байсан, Жошуагийнхыг ч цохино. Шаардлагатай бол би Леннокс Льюисийг өөрийн буланд авч ирнэ” хэмээжээ.
Одоогоор тэд Испанид бэлтгэлээ базааж байгаа бөгөөд Усик Жошуагийн багт зөвлөх төдий бус, ирэх тулаануудад нь илүү чухал үүрэг гүйцэтгэж магадгүй байна.
