АНУ-ын Батлан хамгаалахын сайд Пит Хегсетхийн Иранд явуулж буй цэргийн ажиллагааны талаарх байр суурь Ардчилсан намын хууль тогтоогчдын дунд хүчтэй шүүмжлэл дагуулж, улс төрийн хүрээнд түгшүүр төрүүлж эхэллээ.
Батлан хамгаалахын сайд Пит Хегсетх Ирантай хийж буй дайны стратегийн талаар ярихдаа “дайснаа өршөөхгүй” (no quarter) гэх агуулгатай мэдэгдэл хийсэн нь олон улсын эрх зүй, тэр дундаа Женев конвенцыг ноцтой зөрчиж болзошгүйг ажиглагчид анхааруулж байна. Цэргийн нэр томьёонд “өршөөл үзүүлэхгүй” гэдэг нь бууж өгсөн дайсныг олзлохгүйгээр шууд устгах гэсэн утгыг илэрхийлдэг бөгөөд энэ нь олон улсын хэмжээнд дайны гэмт хэрэгт тооцогддог байна.
Өнгөрсөн жил АНУ-ын Конгрессын гишүүд болон цэргийн өндөр албан тушаалтнуудаас бүрдсэн бүлэг улс төрчид цэргийн алба хаагчид дээд шатны “хууль бус тушаал”-ыг биелүүлэхээс татгалзах эрхтэй бөгөөд үүрэгтэй хэмээн мэдэгдэж байсан юм. Тухайн үед Ерөнхийлөгч Дональд Трамп тэдний энэхүү санаачилгыг “үндэсний эв нэгдлийг бусниулсан” хэрэг хэмээн буруутгаж, хатуу шийтгэл оноох ёстой гэсэн байр суурь илэрхийлж байв. Харин Хегсетхийн сүүлийн үеийн мэдэгдлүүд тэдгээр улс төрчдийн болгоомжлол үндэслэлтэй байсныг баталж байна гэж Ардчилсан намынхан үзэж байна.
Аризона мужийн сенатор Марк Келли болон Мичиган мужийн сенатор Элисса Слоткин нар Батлан хамгаалахын сайдаас албан ёсны тайлбар шаардаж захидал илгээжээ. Сенатор Марк Келли “Батлан хамгаалахын сайдын зүгээс ‘өршөөлгүй’ гэх үгийг ашиглаж байгаа нь дайны хууль болон Женев конвенцын үндсэн зарчимтай зөрчилдөж буй маш аюултай үзэгдэл” хэмээн тэмдэглэсэн байна. Харин Элисса Слоткин “Сайдын энэхүү хариуцлагагүй мэдэгдэл нь түүний удирдлагын арга барилд эргэлзэхэд хүргэж байна” хэмээн шүүмжлэв.
