Америкийн алдарт “Today” шоуны хөтлөгч Саванна Гутри болон түүний ах дүүс Аризона мужийн Тусон хотын оршин суугчдад хандан, долоон долоо хоногийн өмнө сураггүй болсон ээжийгээ олоход туслахыг уриалсан шинэ мэдэгдэл гаргалаа.
84 настай Нэнси Гутриг өнгөрсөн хоёрдугаар сарын 1-ний өглөө эрт Тусон хотын Каталина Фоотхиллс дахь гэрээс нь хүчээр авч явсан буюу хулгайлсан байж болзошгүй гэж хууль хяналтын байгууллагынхан үзэж байна. Хэргийн газраас буюу байшингийнх нь гаднах талбайгаас цусны ул мөр олдсон бөгөөд Холбооны мөрдөх товчоо (FBI)-ноос хоёрдугаар сарын 10-нд нэгэн сэжигтэй бичлэгийг олон нийтэд ил болгосон юм. Тус бичлэгт нүүрээ халхалсан этгээд Гутригийн гэрийн үүдэнд байгааг харуулжээ.
Гэр бүлийнхний гаргасан мэдэгдэлд: “Нэгдүгээр сарын 31-ний өдөр, хоёрдугаар сарын 1-ний өглөө эрт, мөн нэгдүгээр сарын 11-ний оройн цаг үед болсон аливаа сэжигтэй зүйлийг санаж, хяналтын камерын бичлэгээ шалгаж үзэхийг хөршүүд болон нийт иргэдээсээ хүсэж байна. Та бүхний анхаарсан өчүүхэн төдий зүйл ч энэ хэргийг шийдвэрлэхэд үнэлж баршгүй хувь нэмэр болно” хэмээжээ.
Саванна Гутригийн гэр бүлийнхэн ээжийгээ эсэн мэнд буцаан авчрахад туслах бодитой мэдээлэл өгсөн хүнд 1 сая ам.долларын шагнал амлаад байна. Одоогоор мөрдөн байцаалтын явц үргэлжилж байгаа бөгөөд эрх бүхий байгууллагууд сэжигтний талаарх дэлгэрэнгүй мэдээллийг нууцалж байгаа юм.
