Грэммийн шагналт дуучин Шэппел Роан болон Италийн шигшээ баг, Арсенал клубийн хагас хамгаалагч Жоржиньо Фрелло нарын хооронд үл ойлголцол үүсэж, олон нийтийн анхаарлыг татаж байна. Хөлбөмбөгчин Жоржиньо дуучны хамгаалалтын багийг өөрийнх нь охинтой “маш түрэмгий” харьцсан хэмээн буруутгасны хариуд дуучин ийнхүү тайлбар хийжээ.
Жоржиньо Фрелло өөрийн Инстаграм хуудсаараа дамжуулан гэр бүлийнхнийг нь зочид буудалд байх үед дуучны хамгаалагч эхнэр, охин хоёртой нь зүй бус харьцсан тухай мэдээлсэн юм. Түүний хэлснээр охин нь дуучныг мөн эсэхийг баталгаажуулахаар ширээнийх нь хажуугаар алхаж өнгөрөхдөө зүгээр л инээмсэглэсэн бөгөөд ямар нэгэн саад болоогүй атал хамгаалагч нь хэт түрэмгий зан гаргасан аж. Үүнээс болж дуучны үнэнч шүтэн бишрэгч байсан бяцхан охин ихэд айж, уйлсан тухай Жоржиньо харамсан бичжээ.
Харин дуучин Шэппел Роан Инстаграм сторидоо энэхүү үйл явдалд түүний хувийн хамгаалагчид оролцоогүй бөгөөд тухайн хүн нь зочид буудлын хамгаалалтын ажилтан байсныг тодотгосон байна. Тэрээр өглөөний хоолоо идэж байхдаа эх, хүүхэд хоёртой ямар нэгэн байдлаар харилцаа тогтоогоогүй бөгөөд хамгаалагчийн үйлдлийг огт захиалаагүй гэдгээ мэдэгджээ. Мөн тэрээр “Би хүүхдүүдэд дургүй биш” хэмээн онцолж, болсон явдалд өөрийг нь шууд буруутгахгүй байхыг хүссэн байна.
Жоржиньо Фреллогийн зүгээс алдартай уран бүтээлчид шүтэн бишрэгчдийнхээ, ялангуяа хүүхдүүдийн чин сэтгэлийг ойлгож, тэдэнд хүндэтгэлтэй хандах ёстойг сануулсан нь сошиал орчинд томоохон хэлэлцүүлэг өрнүүлээд байна.
