Ням гарагт “Тоттенхэм Хотспур” цэнгэлдэх хүрээлэнд болсон Английн Премьер лигийн 31 дүгээр тойргийн чухал тоглолтод “Ноттингем Форест” баг талбайн эздийг 3:0 харьцаатайгаар буулган авлаа. Энэхүү ялагдал нь “Тоттенхэм”-ийг лигийн хүснэгтийн 17 дугаар байр руу унаж, доод лиг рүү унах аюулд тун ойрхон авчирлаа.
Тоглолтын эхний хагасын төгсгөлд “Ноттингем Форест”-ын довтлогч Игор Жезус Неко Уильямсийн дамжуулалтаар мөргөж гоолдсоноор зочид тэргүүлж эхэлсэн. Удаах гоолуудыг Морган Гиббс-Уайт 62 дахь минутад, Тайво Авонийи 86 дахь минутад тус тус оруулж, “Спөрс”-ийн хөгжөөн дэмжигчдийг цэнгэлдэх хүрээлэнг эрт орхиход хүргэсэн юм.
“Тоттенхэм” баг 2026 он гарснаас хойш лигийн 13 тоглолтод дараалан хожил авч чадаагүй байгаа бөгөөд энэ нь тус багийн түүхэн дэх хамгийн муу үзүүлэлтүүдийн нэг болоод байна. Өнгөрсөн хоёрдугаар сард багийн жолоог атгасан Игор Тудорын удирдлага дор баг лигийн 5 тоглолтоос ердөө нэг оноо авсан нь түүний ирээдүйг эргэлзээтэй болгож, хөгжөөн дэмжигчдийн зүгээс хүчтэй шүүмжлэл дагуулж байна.
Нөгөө талд, “Ноттингем Форест” баг энэ долоо хоногт гайхалтай амжилт үзүүллээ. Тэд пүрэв гарагт Европын лигийн шөвгийн 16-д Данийн “Мидтъюлланд” багийг торгуулийн цохилтоор буулган авч, шөвгийн наймд шалгарсан бол ийнхүү лигтээ ч чухал ялалт байгуулж, хүснэгтийн 16 дугаар байр руу ахиж чадлаа.
“Тоттенхэм”-ийн хувьд дараагийн шийдвэрлэх тоглолтоо дөрөвдүгээр сарын 12-нд “Сандерленд” багийн эсрэг хийх хуваарьтай байна.
