АНУ-ын Техас мужийн Хьюстон хотын орчимд өнгөрсөн бямба гарагт хүчтэй дэлбэрэлтийн чимээ сонсогдож, тэнгэрт ногоон туяа татсаны дараа нэгэн айлын дээвэр дээр сансрын биет унасан шуугиант хэрэг гарлаа.
Оршин суугч Шерри Жеймсийн хувьд гэр дотор нь асар хүчтэй чимээ гарч, дээвэр нь цоорсон байхыг хараад гайхширсан байна. Тэрээр “Би тэр чулууг хараад л шууд солир байна гэж бодсон. Маш хүнд бөгөөд энгийн чулуунаас огт өөр бүтэцтэй байсан” хэмээн ярьжээ. Бренхэм хотын гал түймэртэй тэмцэх газрын ажилтнууд газар дээр нь ажиллаж, тухайн биет нь сансраас гаралтай болохыг урьдчилсан байдлаар тогтоосон байна.
НАСА-гаас (NASA) гаргасан албан ёсны мэдээллээр, ойролцоогоор нэг тонн жинтэй, 0.9 метр голчтой солир Хьюстоны баруун хойд хэсэгт, Stagecoach орчмоор 79 км-ийн өндөрт анх харагджээ. Уг биет цагт 56,327 км-ийн асар өндөр хурдтайгаар зүүн өмнөд зүгийг чиглэн нисэж байгаад 46.7 км-ийн өндөрт агаарт задарсан байна.
Солир задрах явцад үүссэн даралтын долгион нь Хьюстон даяар сонсогдсон хүчтэй “нүргээн”-ийг бий болгосон бөгөөд цаг агаарын радар Willowbrook болон Northgate Crossing бүс нутгуудын хооронд солирын хэлтэрхийнүүд унасныг бүртгэж авчээ. Хэдийгээр айлын дээвэр цоорч, эд хөрөнгийн хохирол учирсан ч аз болоход хүний амь нас, эрүүл мэнд хохирсон тохиолдол бүртгэгдээгүй байна.
Сансар судлаачид тухайн бүс нутгийн оршин суугчдыг өөрийн эзэмшил газраас хачирхалтай чулуу олдвол мэргэжлийн байгууллагад хандахыг уриалж байгаа бөгөөд энэхүү ховор олдвор нь нарны аймгийн үүсэл гарлыг судлахад үнэтэй хувь нэмэр оруулна гэж үзэж байна.
