Хиймэл оюун ухааны (AI) эрин үед технологийн акулууд ажилтнуудынхаа бүтээмжийг хэмжих шинэ, сонирхолтой бөгөөд маргаан дагуулсан аргыг нэвтрүүлж байна. “Нью-Йорк Таймс” сонины мэдээлснээр, Meta болон OpenAI зэрэг компаниуд ажилтнууд нь хэр их “токен” буюу AI-ийн өгөгдөл ашиглаж байгааг дотооддоо бүртгэж, үүнийг ажлын гүйцэтгэлийн үнэлгээнд тусгаж эхэлжээ.
“Токенмаксжих” (tokenmaxxing) хэмээн нэрлэгдээд буй энэхүү шинэ хандлага нь ажилтнууд өдөр тутмын ажилдаа AI хэрэгслийг хэр идэвхтэй нэгтгэж байгааг харуулах гол үзүүлэлт болж байна. Meta болон Shopify компаниуд AI-ийг өргөнөөр ашигладаг ажилтнуудаа урамшуулж, харин уламжлалт арга барилаараа ажиллагсдыг шүүмжлэх болсон нь менежментийн шинэ стратеги болон хувирчээ.
Энэхүү хөгжил нь OpenClaw зэрэг AI агент платформуудын эрэлттэй шууд холбоотой юм. OpenAI компани салбартаа тэргүүлэгч байр сууриа хадгалахын тулд ийм төрлийн платформ бүтээгчдийг эгнээндээ нэгтгэж, хэрэглээний цар хүрээгээ тэлсээр байна. Мөн Claude Code зэрэг системүүд гар утсанд суурилсан хувилбараа гаргаж, AI-ийн хэрэглээг хэзээ ч, хаанаас ч ашиглах боломжийг бүрдүүлжээ.
Компаниуд токен хэрэглээг ийнхүү онцолж байгаа нь хөрөнгө оруулагчдад хаягласан “мессеж” юм. OpenAI-ийн ерөнхийлөгч Грег Брокман саяхан мэдэгдэхдээ, тэдний GPT-5.4 загвар өдөрт 5 их наяд токен боловсруулж байгаа бөгөөд энэ нь жилийн цэвэр орлогыг 1 тэрбум ам.долларт хүргэсэн гэдгийг онцолжээ. Асар их тоо бүхий статистик нь тухайн компанийн AI салбар дахь нөлөөг илтгэх гол зэвсэг болж байна.
Гэвч зарим шинжээчид ажилтнуудыг зөвхөн токен ашиглалтаар нь дүгнэх нь чанараас илүү тоонд анхаарсан, төөрөгдүүлсэн арга байж болохыг анхааруулсаар байна.
