АНУ-ын Сангийн сайд Скотт Бессент Ирантай үүсээд буй зэвсэгт мөргөлдөөний зардалд зориулж иргэдийн татварыг нэмэхгүй гэдгээ албан ёсоор мэдэгдлээ. Тэрээр ням гарагт NBC телевизийн “Meet the Press” нэвтрүүлэгт оролцохдоо Америкийн засгийн газарт энэхүү ажиллагааг санхүүжүүлэх “хангалттай мөнгө” бий хэмээн онцолсон байна.
Пентагоны зүгээс Ирантай хийж буй дайны нэмэлт зардалд зориулж 200 тэрбум ам.долларын нэмэлт санхүүжилт хүссэн тухай мэдээлэл гараад байгаа юм. Бессент энэхүү мөнгөн дүнг шууд батлаагүй ч цэргийн салбарын жилийн 1 их наяд ам.долларын төсөв нь нөөц бололцоо сайтайг дурдаад, татвар нэмэх тухай асуултыг “утгагүй зүйл” хэмээн няцаажээ. Тэрээр “Ерөнхийлөгч Трамп эхний бүрэн эрхийн хугацаандаа цэргийн хүчээ зузаатгасан шигээ одоо ч бэхжүүлсээр байна. Бидэнд энэ дайныг санхүүжүүлэх хөрөнгө хангалттай” гэв.
Одоогийн байдлаар Ормузын хоолой дахь нөхцөл байдлаас шалтгаалж дэлхийн зах зээл дээр нефтийн үнэ өсөж, АНУ-д шатахууны үнэ нэг сарын дотор нэг орчим доллараар нэмэгдээд байгаа юм. Энэ нь иргэдийн нуруун дээрх эдийн засгийн ачааллыг нэмэгдүүлж байгаа тул Конгресс дахь Ардчилсан намынхан болон зарим Бүгд найрамдахчууд 200 тэрбум ам.долларын нэмэлт зардлыг эсэргүүцэх төлөвтэй байна.
Дайны ажиллагаа эхэлснээс хойш эхний зургаан хоногт л гэхэд 11 тэрбум гаруй ам.доллар зарцуулагдсан гэх тооцоо гарчээ. Сүүлийн мэдээгээр АНУ-ын зэвсэгт хүчин Ираны тэнгисийн цэргийн 120 гаруй хөлөг онгоц, бүх 11 шунгагч онгоцыг нь устгаад байгаа аж. Пентагоны тэргүүн Пит Хегсет нэмэлт санхүүжилтийг “муу залуусыг устгахад мөнгө хэрэгтэй” хэмээн тайлбарлаж, зэвсгийн нөөцөө яаралтай нөхөх шаардлагатай байгааг мэдэгдсэн байна.
