Технологийн салбарт санах ойн чипний эрэлт нэмэгдэхийн хэрээр Apple-ийн албан ёсны дэлгүүрүүд дэх гадны хадгалах төхөөрөмжүүдийн үнэ хэрэглэгчдийг цочирдуулам түвшинд хүрлээ. Тодруулбал, Apple компани MacBook Air болон MacBook Pro загваруудынхаа үнийг 100 доллараар нэмээд зогсохгүй SanDisk брэндийн SSD-үүдийн үнийг 200 хүртэл хувиар өсгөсөн байна.
Өмнө нь ойролцоогоор 500 ам.долларын үнэтэй байсан 4TB багтаамжтай SanDisk SSD одоо 1,200 ам.долларт хүрсэн бол 120 ам.доллараар борлуулагддаг байсан 1TB хувилбар нь 360 ам.доллар болж нэмэгджээ. Ийм хэмжээний үнийн өсөлт нь жижиглэн худалдааны салбарт маш ховор үзэгдэл юм.
Шинжээчдийн үзэж байгаагаар энэхүү үнийн хөөрөгдөл нь зөвхөн нэг брэндтэй холбоотой бус, харин хиймэл оюун ухааны (AI) дата төвүүдийн асар их хэрэглээнээс үүдэлтэй санах ойн чипний хомсдолтой шууд холбоотой аж. AI салбарын эрчимтэй хөгжил нь өндөр хурдтай санах ой (HBM) болон RAM-ийн эрэлтийг дээд цэгт нь хүргэж, үйлдвэрлэгчид энгийн хэрэглээний SSD болон DRAM-ийн үйлдвэрлэлээ танахад хүргэсэн байна.
Санах ойн зах зээлийн энэхүү хямрал нь зөвхөн SSD-ээр хязгаарлагдахгүй байгаа бөгөөд сүүлийн саруудад хатуу дискийн (HDD) үнэ ч мөн дунджаар 46 хувиар өсөөд байна. Хэрэглэгчдийн хувьд компьютер болон түүний дагалдах хэрэгслийг шинэчлэхэд урьд өмнө байгаагүй өндөр зардал гарах нөхцөл байдал үүсээд байна.
