Технологийн ертөнцийн тэрбумтан Илон Маск ээлжит нэгэн амбицтай төлөвлөгөөгөө танилцууллаа. Техас мужийн Остин хотод болсон арга хэмжээний үеэр тэрээр “Terafab” нэртэй чип үйлдвэрлэлийн аварга үйлдвэр байгуулах болсноо албан ёсоор зарлалаа. Энэхүү байгууламж нь Tesla, SpaceX болон xAI компаниудын ирээдүйн хэрэгцээг хангах стратегийн чухал алхам болох юм.
Уг үйлдвэр нь үндсэн хоёр төрлийн чип үйлдвэрлэхээр төлөвлөгдөж байна. Эхнийх нь Tesla-гийн өөрөө жолоодогч систем болон “Optimus” хүн дүрст роботуудад зориулсан “edge and inference” технологи бүхий чипүүд байх юм. Харин хоёр дахь төрөл нь сансар огторгуйн эрс тэс орчинд ажиллах чадвартай, SpaceX-ийн “галактикийн иргэншил” байгуулах алсын харааг дэмжих өндөр хүчин чадалтай процессорууд байх ажээ.
Илон Маск одоогийн байдлаар Samsung, TSMC зэрэг салбарын аваргуудтай хамтран ажиллаж байгаа ч тэдний үйлдвэрлэлийн өсөлт түүний хурдыг гүйцэхгүй байгааг онцолсон юм. “Terafab” үйлдвэр нь жилд нэг тераватт эрчим хүчний хэрэглээг хангахуйц хэмжээний чип үйлдвэрлэх хүчин чадалтай байх бөгөөд энэ нь хиймэл оюун ухааны (AI) салбарын эрчимтэй өсөлтийг дэмжихэд шийдвэрлэх үүрэг гүйцэтгэх юм.
Төслийн санхүүжилтийн хувьд асар өндөр дүн яригдаж байна. Зөвхөн энэ жил Tesla компани 20 тэрбум гаруй долларыг технологийн шинэчлэлд зарцуулахаар төлөвлөж байгаа бол шинжээчдийн тооцооллоор “Terafab”-ын нийт өртөг 300 тэрбум долларт хүрч болзошгүй байна.
АНУ-д чип үйлдвэрлэлийн ийм хэмжээний байгууламж барих нь Тайвань зэрэг орнуудтай харьцуулахад илүү их цаг хугацаа, нарийн тоног төхөөрөмж шаарддаг тул уг төсөл хэдэн жилийн турш үргэлжлэх төлөвтэй. Маскийн энэхүү төлөвлөгөө нь АНУ-ын хагас дамжуулагчийн салбарт томоохон сорилт төдийгүй шинэ боломжуудыг авчирна гэж мэргэжилтнүүд үзэж байна.
