Ойрхи Дорнод дахь хурцадмал байдал намжих шинжгүй байна. Хэдийгээр АНУ-ын Ерөнхийлөгч Дональд Трамп цэргийн ажиллагааг “шувтаргын шатандаа орж байна” хэмээн мэдэгдсэн ч Израилийн цэргийн өндөр албан тушаалтнууд болон дипломатууд үүнийг үгүйсгэж, дайн үргэлжлэхийг санууллаа.
Хоёрдугаар сарын 28-нд АНУ болон Израилийн хамтарсан цэргийн ажиллагааны үеэр Ираны Дээд удирдагч аятолла Хаменей амь үрэгдсэн нь бүс нутагт томоохон цохилт болсон юм. Гэсэн ч Ираны засаг захиргаа барууны орнуудын хүчтэй дарамт шахалтын дор бүрэн нуран унаагүй байна. Ерөнхийлөгч Трамп Ираны иргэний дэд бүтцийг онилно хэмээн сүрдүүлж байгаа нь олон улсын түвшинд дайны гэмт хэрэгт тооцогдож болзошгүй гэсэн болгоомжлолыг төрүүлж буй. Стратегийн ач холбогдол бүхий Хормузын хоолой хаагдсанаас үүдэн дэлхийн зах зээлд газрын тосны үнэ огцом өссөн нь Трампын засаг захиргааны хувьд нэн тэргүүний шийдвэрлэх асуудал болоод байна.
Ням гарагт Израиль улсаас АНУ-д суугаа Элчин сайд мэдэгдэл хийхдээ, энэхүү дайн нь “Тегераны дэглэмийг өвдөг дээрээ сөхрүүлэх хүртэл үргэлжлэх болно” гэж онцолсон юм. Тэрээр Ираны баллистик пуужингийн чадамжийн талаарх мэдээллүүдийг няцааж, тус улсын эрх баригчдыг хор хөнөөлтэй бодлого явуулж байна хэмээн буруутгав.
Мөргөлдөөний явцад Ираны талаас Израилийн өмнөд хэсэг рүү пуужингийн цохилт өгсний улмаас 180 орчим хүн шархадсан бөгөөд Тегеран Израилийн цөмийн байгууламжийг гол бай болгосон байна. Хэдийгээр 2025 онд АНУ болон Израиль Ираны цөмийн гурван байгууламжийг устгасан ч тус улс хөтөлбөрөө нууцаар үргэлжлүүлж байгаа эсэх нь маргаантай хэвээр байгаа нь дайны цаашдын төлөвлөгөөг тодорхойлоход хүндрэл учруулж байна.
Израилийн Зэвсэгт хүчний дарга, генерал Эйял Замир “Дайн дуусах нь ойртоогүй” гэж мэдэгдсэн нь Цагаан ордны “Блицкриг ажиллагаа дуусч байна” гэсэн өнгө аястай эрс зөрчилдлөө. АНУ-ын дотоодод Трампын холбоотнууд болон өрсөлдөгчид нь дайнаас гарах гарц олохыг шаардаж байгаа бол Вашингтоны зарим неоконсерватив үзэлтнүүд Ираны дэглэмийг бүрэн унагах хүртэл цэргийн ажиллагааг зогсоохгүй байхыг уриалж байна. Трамп анхны бүрэн эрхийн хугацаандаа 2015 оны цөмийн хэлэлцээрээс (JCPOA) гарч, “хамгийн их дарамт” үзүүлэх бодлого баримталж байсан нь өнөөдрийн шууд мөргөлдөөний суурь болсон гэж шинжээчид үзэж байна.
