Ираны баллистик пуужингийн заналхийлэл бодит болж, Европын томоохон хотууд тэр дундаа Лондон хот тусгалын бүсэд багтаж байгааг Израилийн талаас анхааруулсантай холбоотойгоор Их Британийн батлан хамгаалах салбарын шинжээчид түгшүүр зарлаж эхэллээ.
Мэргэжилтнүүдийн үзэж буйгаар Нэгдсэн Вант Улсын одоогийн агаарын довтолгооноос хамгаалах систем нь орчин үеийн баллистик пуужингуудын дайралтыг няцаах хэмжээний нөөц бололцоо, техник технологиор дутмаг байгаа аж. Ираны цэргийн удирдлагууд Лондон, Парис, Берлин зэрэг хотуудыг онилсон пуужингийн хүчин чадлаа гайхуулсны дараа энэ асуудал стратегийн түвшинд хүчтэй яригдах болов. Ялангуяа Диего Гарсиа дахь Британийн цэргийн бааз руу чиглэсэн пуужингийн аюулыг Израилийн тагнуулын алба илрүүлсэн нь нөхцөл байдлыг улам хурцатгасан юм.
Хэдийгээр Стив Рийд зэрэг Засгийн газрын сайд нар улс орноо аюулгүй хэмээн мэдэгдэж, Израилийн анхааруулгыг “дайны сурталчилгаа” хэмээн няцааж байгаа ч цэргийн шинжээчид өөр байр суурьтай байна. Профессор Майкл Кларк энэ талаар “Хэрэв Их Британи Орос эсвэл Иранаас ирэх баллистик пуужингийн довтолгооноос өөрийгөө хамгаалж чадах уу гэж асуувал хариулт нь шууд ‘Үгүй’ байна. Бидэнд тийм чадамж одоогоор алга” хэмээн эрс мэдэгджээ.
Батлан хамгаалахын шинжээч, хурандаа Бен Барри мөн адил Британийн арми баллистик болон далавчит пуужин, нисгэгчгүй онгоцны нэгдсэн довтолгооноос нутаг дэвсгэрээ төдийгүй хилийн чанадад үүрэг гүйцэтгэж буй бие бүрэлдэхүүнээ хамгаалахад хүчин мөхөсдөх эрсдэлтэйг сануулж байна. Британийн тэнгисийн цэргийн “Type 45” ангиллын устгагч хөлөг онгоцнууд агаарын хамгаалалтын гол цөм боловч тэдгээрийн тоо ширхэг болон байлдааны бэлэн байдал хангалтгүй байгааг шүүмжлэгчид онцолсоор байгаа юм.
Батлан хамгаалах яамны зүгээс “Sky Sabre” зэрэг агаарын довтолгооноос хамгаалах шинэ системүүдэд хөрөнгө оруулалт хийж, зэвсэглэлээ шинэчилж байгаагаа мэдэгдсэн ч эдгээр нь баллистик пуужингийн эсрэг хэр үр дүнтэй байх нь эргэлзээтэй хэвээр байна. Пуужингийн аюулаас хамгаалах асуудал нь зөвхөн техник технологийн бус, улс орны үндэсний аюулгүй байдлын нэн тэргүүний зорилт болоод байна.
