Доминиканы боксчин Луис Нунез сүүлийн тулаандаа ердөө нэгдүгээр раундэд нокаутаар ялалт байгуулж, өөрийн ур чадварыг боксын ертөнцөд дахин тамгаллаа. Түүний энэхүү гайхалтай тоглолтыг боксын домог Роберто Дуран биширч, түүнийг ирээдүйн дэлхийн аварга хэмээн нэрлэжээ.
Өдгөө 26 настай Луис Нунез энэ сарын эхээр рингэнд эргэн ирж, Жан Эстивен Камачог эхний раундэд техникийн нокаутаар буулган авсан юм. Энэ нь түүний өнгөрсөн арванхоёрдугаар сард Хектор Андрес Сосаг оноогоор хожиж байснаас хавьгүй илүү эрч хүчтэй тоглолт байлаа. Рингний хажууд тулааныг ажиглаж суусан Роберто Дуран залуу боксчны хурд, хүчийг өндрөөр үнэлсэн байна.
Нунезийн буланд домогт Роберто Дураны хүү ажиллаж байгаа бөгөөд түүнийг алдартай дасгалжуулагч Боб Сантос удирдаж байгаа юм. Сантос өмнө нь Роберт Герреро, Эрисланди Лара зэрэг дэлхийн аваргуудтай ажиллаж байсан туршлагатай нэгэн. Тэрээр “BoxingScene” сайтад өгсөн ярилцлагадаа “Дуран энэ хүүгийн цохилтын хурд, хүчийг хараад ‘Тэр дэлхийн аварга болох нь тодорхой’ гэж хэлсэн. Ийм агуу хүнээс ийм үг сонсоно гэдэг том хүлээн зөвшөөрөлт” хэмээн дурджээ.
Одоогоор Нунез 126 фунтийн жингийн ангилалд (featherweight) хүч үзэж байгаа бөгөөд WBO бүсний аварга Рафаэль Эспинозатай тулалдахыг эрмэлзэж байна. Эспиноза нь Олимпын аварга Робейси Рамирезийг хоёр ч удаа буулган авч, бүсээ амжилттай хамгаалаад байгаа хүчирхэг аварга юм. Хэдийгээр Нунезийн баг шилдэгүүдтэй тулалдахад бэлэн байгаа ч Мексикийн аваргатай ойрын хугацаанд халз тулаан хийх магадлал бага байна.
Харин Нунезийн хувьд хамгийн боломжит хувилбар нь IBF холбооны бүсний төлөөх тулаан юм. Одоогоор тус бүсийг Анжело Лео эзэмшиж байгаа бөгөөд Луис Нунез IBF-ийн чансааны гуравдугаарт эрэмбэлэгдэж байгаа нь аваргын төлөө тулалдахад тун ойрхон байгааг илтгэж байна.
