Кикбоксын ертөнцийн амьд домог Рико Верхувен холимог тулааны (MMA) болон боксын хүрээнд хамгийн эрэлттэй тамирчдын нэг болоод байна. Гэвч тэрээр Netflix-ийн анхны MMA арга хэмжээнд Фрэнсис Нганнутай тулалдаж, карьерынхаа хамгийн өндөр ашгийг олох боломжоос татгалзсан нь тулааны спорт сонирхогчдын анхаарлыг татлаа.
Glory байгууллагын хүнд жингийн аваргын бүсийг 12 жилийн турш эзэмшсэн Рико 2026 он гарснаар чөлөөт тамирчин болж, шинэ сорилтуудыг хайж эхэлсэн юм. Түүнд UFC-ийн зүгээс Деррик Льюистэй тулалдах санал тавьсан ч тэрээр татгалзсан. Үүний дараа Жэйк Полын MVP байгууллагаас Netflix-ийн түүхэн дэх анхны MMA тулааны үдэш Фрэнсис Нганнутай тулалдах нүсэр саналыг ирүүлжээ.
Хэдийгээр Нганнутай хийх тулааны шагнал нь боксын рингэнд Олександер Усиктай тулалдахаас хамаагүй өндөр байсан ч Рико “Smash Cast”-д өгсөн ярилцлагадаа яагаад татгалзсанаа тайлбарлав. Тэрээр Турки Алалшихид боксын тулаан хийх амаар амлалт өгсөн байсан бөгөөд “Миний үг бол миний үнэ цэн. Би мөнгөний төлөө амлалтаасаа няцахыг хүсээгүй” хэмээн онцолжээ.
Ийнхүү Рико ирэх тавдугаар сарын 23-нд боксын WBC болон бусад холбоодын хүнд жингийн дэлхийн аварга Олександер Усиктай тулалдахаар боллоо. Тэрээр Тайсон Фьюри, Энтони Жошуа зэрэг боксын акулуудын хийж чадаагүй зүйлийг хийж, Усикын ялагдашгүй цувралыг зогсоох том зорилго өвөртлөн бэлтгэлдээ гарчээ.
Харин Рико Верхувены татгалзсан хариуны дараа MVP байгууллага Фрэнсис Нганнугийн өрсөлдөгчөөр Филипе Линсийг сонгосон байна. Тус арга хэмжээ нь Ронда Раузи, Жина Карано нарын эргэн ирэлтийн тулаанаар голлох бөгөөд тавдугаар сарын 16-нд Netflix-ээр шууд дамжуулагдах юм.
