Ойрх Дорнодын геополитикийн нөхцөл байдал хурцдаж буй энэ үед Иран улс АНУ-ын цэргийн давуу хүчний эсрэг уламжлалт бус буюу “босогчдын тактик” (insurgency tactics)-ыг сонгон тулалдаж байна. Тегеран цэргийн чадавхаар Вашингтонтой шууд нүүр тулах боломжгүй ч стратегийн тооцоотой өдөөн хатгалтуудаар АНУ-ыг бүс нутгаас шахан гаргахыг эрмэлзэж байгааг шинжээчид онцоллоо.
Ираны стратеги нь Персийн булан дахь АНУ-ын цэргийн баазууд болон эрчим хүчний чухал дэд бүтцүүдийг онилох замаар Цагаан ордоныг цэргийн хүчээ үр ашиггүй дайчлахад хүргэхэд оршиж байна. Мөн хөрш зэргэлдээ Саудын Араб, Арабын Нэгдсэн Эмират, Оман зэрэг улсууд руу чиглэсэн дайралт нь тэдгээр улс болон АНУ-ын харилцаанд ан цав суулгах, бүс нутгийн тогтвортой байдлыг алдагдуулах зорилготой юм.
Цэргийн хүчний дорой байдлаа нөхөх Ираны “хөнгөн” зэвсэглэл:
- Камиказе дрон болон алсын удирдлагатай нисгэгчгүй төхөөрөмжүүд.
- Персийн буланд хурдтай маневр хийх чадвартай жижиг завинууд.
- Гормузын хоолойг хаах замаар дэлхийн эдийн засагт цохилт өгөх тактик.
- Иргэний нисэх буудал, эрчим хүчний байгууламжуудыг онилох замаар олон улсын дарамт үүсгэх.
АНУ-ын хувьд энэхүү босогчдын тактикийг даван туулахын тулд зөвхөн цэргийн хүчээр хариу барих бус, олон улсын хамтын ажиллагааг бэхжүүлэх, иргэний аюулгүй байдлыг хамгаалах тал дээр түлхүү анхаарах шаардлага тулгарч байна. Ираны эцсийн зорилго бол АНУ-ыг улс төр, эдийн засаг болон дотоодын эсэргүүцлийн дарамтад оруулж, бүс нутгаас цэргээ гаргахаас өөр аргагүй байдалд хүргэх явдал юм.
