Орчин үеийн залуус болон өсвөр насныхан хувийн харилцаанд үүссэн ээдрээтэй асуудлуудаа шийдвэрлэх, тэр дундаа хүнд хэлэлцээр хийхдээ хиймэл оюун ухааны чатботуудыг ашиглах болсон нь судлаач, сэтгэл зүйчдийн анхаарлыг татаж байна. CNN агентлагийн мэдээлснээр, ChatGPT зэрэг технологийн дэвшлийг амьдралын нарийн мэдрэмж шаардсан мөчүүдэд өөрсдийн оронд ашиглах үзэгдэл залуучуудын дунд эрс нэмэгджээ.
Үүний нэг жишээ бол Йелийн их сургуулийн оюутан Патрик танилцсан бүсгүйдээ татгалзсан хариу өгөхдөө ChatGPT-г ашигласан тохиолдол юм. Чатбот түүний өмнөөс зургаан бүлэг бүхий, хэт албан ёсны захидал бичсэн нь залуу хүмүүсийн харилцаанд огт нийцэхгүй, хиймэл байжээ. Захидлыг хүлээн авсан бүсгүй эхэндээ гайхсан ч найз нөхөдтэйгөө зөвлөлдсөний эцэст уг бичвэрийг 99 хувь хиймэл оюун ухаанаар бичүүлсэн болохыг төвөггүй анзаарсан байна.
Патрик хүнд нөхцөл байдалд хэрхэн харилцахаа мэдэхгүй байсан тул чатботоос тусламж авснаа хүлээн зөвшөөрчээ. Шинжлэх ухааны хэллэгээр үүнийг “нийгмийн ачааллыг шилжүүлэх” (social offloading) гэж нэрлэдэг бөгөөд хүмүүс өөрсдийн танин мэдэхүйн болон сэтгэл хөдлөлийн хүнд ажлыг технологийн тусламжтайгаар гүйцэтгэх үйл явц юм.
Common Sense Media байгууллагын судалгааны албаны дарга Майкл Робб энэ талаар ярихдаа, “Хэрэв та ойр дотны хүмүүстэйгээ харилцах үйл явцаа хиймэл оюун ухаанд даатгаж байгаа бол өөрийнхөө мэдрэмжийг илэрхийлэх чадварыг гадагш нь алдаж байна гэсэн үг” хэмээн анхааруулжээ. Залуучууд ийнхүү технологид хэт найдах нь ирээдүйд өөрийнхөө үзэл бодол, үг хэллэгт итгэх итгэлээ алдаж, бодит харилцаанаас зугтах эрсдэлийг дагуулж байгааг мэргэжилтнүүд онцолж байна.
