Ойрхи Дорнодод үүссэн зэвсэгт мөргөлдөөний улмаас дэлхийн зах зээл дээр Brent маркийн газрын тосны үнэ нэг баррель нь 100 ам.доллараас давсан нь ОХУ-ын төсвийн орлогыг үлэмж нэмэгдүүлэх эх үүсвэр болж байна. АНУ болон Израилийн цэргийн ажиллагаанаас үүдэлтэй эрчим хүчний нийлүүлэлтийн хязгаарлалт нь Оросын газрын тос, хийн компаниудад гэнэтийн ашиг авчирчээ.
Ерөнхийлөгч Владимир Путин эдийн засгийн салбарын төлөөлөгчидтэй уулзах үеэрээ эдгээр компаниудыг Ойрхи Дорнодын хямралаас олсон нэмэлт орлогоо дотоодын банкуудаас авсан зээлээ төлөхөд зарцуулахыг санууллаа. Тэрээр энэхүү алхмыг компаниудын хувьд санхүүгийн сахилга батаа бэхжүүлэх “боловсорсон шийдвэр” байх болно гэдгийг онцлон тэмдэглэсэн байна.
Украины дайнаас шалтгаалсан олон улсын хориг арга хэмжээний улмаас Оросын “Urals” маркийн газрын тос өмнө нь хямдралтай үнээр борлуулагдаж байсан юм. Гэвч дэлхийн зах зээл дээрх үнийн өсөлт нь Оросын улсын төсөвт өдөрт дунджаар 150 сая ам.долларын нэмэлт орлого оруулах боломжийг бүрдүүлээд байна.
Түүнчлэн АНУ-ын Сангийн яамнаас Оросын газрын тосны бүтээгдэхүүнийг борлуулахтай холбоотой зарим хоригийг түр хугацаанд хөнгөвчлөх шийдвэр гаргасан нь Азийн орнуудын сонирхлыг дахин татаж эхэлжээ. Ойрхи Дорнодын нийлүүлэлтээс ихээхэн хамааралтай Азийн хэд хэдэн улс эрчим хүчний аюулгүй байдлаа хангахын тулд Оросын газрын тосыг худалдан авах хувилбарыг идэвхтэй авч үзэж байна.
