Технологийн салбарын тэргүүлэгч Microsoft компани өөрийн Windows үйлдлийн системд Copilot хиймэл оюун ухааныг хэт их нэвтрүүлсэн нь хэрэглэгчдийн зүгээс ихээхэн шүүмжлэл дагуулж байгааг албан ёсоор хүлээн зөвшөөрлөө. Copilot чатботыг системийн өнцөг булан бүрт “хүчээр” байршуулсан нь хэрэглэгчдэд таагүй сэтгэгдэл төрүүлж, улмаар зарим хэрэглэгчид өөр үйлдлийн систем рүү шилжих хандлага ажиглагдаж эхэлсэн байна.
Windows-ийн дэд ерөнхийлөгч Паван Давулури “Windows-ийн чанар” хэмээх нийтлэлдээ хиймэл оюун ухааныг хэрэглэгчдэд тулгаж байсан алдаагаа шууд бус байдлаар хүлээн зөвшөөрсөн байна. Тэрээр хэрэглэгчдийн санал гомдлыг анхааралтай судалсны үндсэн дээр Copilot-ийг хаана, хэрхэн нэвтрүүлэх тал дээр илүү бодолтой хандаж, зөвхөн үнэхээр ашигтай, чанартай туршлагад анхаарлаа хандуулахаа мэдэгджээ.
Энэхүү шийдвэрийн хүрээнд Snipping Tool, Photos, Widgets болон Notepad зэрэг программуудаас Copilot-ийн шаардлагагүй оролтыг багасгаж эхэлсэн байна. Энэхүү алхам нь том хэлний загвар (LLM) дээр суурилсан технологийг хэрэглэгчийн өдөр тутмын бүтээгдэхүүнд үр дүнтэй нэвтрүүлэхэд технологийн компаниудад ямар их бэрхшээл тулгарч байгааг харуулж буй хэрэг юм.
Хиймэл оюун ухааныг нэвтрүүлэх оролдлогууд хэрэглэгчдийн дургүйцлийг хүргэхээс гадна кибер аюулгүй байдлын ноцтой асуудал үүсгэж болзошгүйг шинжээчид анхааруулдаг. Тухайлбал, Notepad программ дахь Copilot-ийн үйл ажиллагаа зарим алдаа гаргахад хүргэж байсан тохиолдол бий. Цаашид Windows үйлдлийн системд илүү хурдан хайлтын систем, найдвартай File Explorer болон санах ойн (RAM) хэрэглээг бууруулах зэрэг системийн үндсэн ажиллагааг сайжруулахад анхаарна гэдгийг Давулури амласан байна.
