HBO сувгийн хит цуврал болох “The Last of Us”-ийн гуравдугаар бүлэгт тоглох жүжигчдийн нэрс тодорхой болсон нь үзэгчдийн дунд багагүй маргаан дагуулж байна. Deadline агентлагийн мэдээлснээр, зохиолын гол дүрүүдийн нэг болох Ярагийн дүрд Мишель Мао, харин түүний дүү Лэвийн дүрд Кириана Кратер нар тоглохоор болжээ.
Энэхүү сонголт шүүмжлэл дагуулах болсон гол шалтгаан нь Лэв хэмээх 13 настай трансжендер хүүгийн дүрд трансжендер бус (cisgender) жүжигчин сонгосон явдал юм. “The Last of Us Part II” видео тоглоомд Лэвийн дүрийг трансжендер жүжигчин Иан Александер бүтээж байсан бол цувралын уран бүтээлчид энэ удаад “Star Wars: Skeleton Crew” цувралаар танигдсан Кириана Кратерыг сонгосон нь анхаарал татаж байна.
Лэвийн хувьд түүний трансжендер байдал нь дүрийн хөгжил болон түүхэнд маш чухал үүрэг гүйцэтгэдэг. Тэрээр өөрийн харьяалагддаг “Серафит” хэмээх шашны хатуу бүлэглэлийн тогтоосон хүйсийн хэм хэмжээг зөрчсөний улмаас хавчигдаж, эгчийнхээ хамт дүрвэн явахад хүрдэг билээ. Улмаар тэрээр цувралын гол дүрүүдийн нэг болох Эббигийн аяллын салшгүй хэсэг болдог.
Кино сонирхогчид болон идэвхтнүүдийн үзэж буйгаар, трансжендер дүрийг тухайн амьдралын туршлагатай жүжигчнээр бүтээлгэх нь дүрийг илүү бодитой, үнэмшилтэй болгох боломж байсан хэмээн үзэж байна. Хэдийгээр Холливуудад трансжендер бус жүжигчид ийм төрлийн дүрд тоглох тохиолдол байдаг ч, “The Last of Us” шиг өндөр хүлээлттэй бүтээлийн хувьд энэ нь боломжийг алдсан хэрэг хэмээн шүүмжлүүлж байгаа юм.
Цувралын гуравдугаар бүлэгт Эбби болон Лэв нарын харилцаа дэлгэцийн ихэнх цагийг эзлэх төлөвтэй байгаа тул энэхүү дүрийн сонголт цаашид үзэгчдийн дунд ямар сэтгэгдэл төрүүлэх нь олны анхаарлын төвд байна.
