Алдарт жүжигчин, WWE-ийн домогт рестлер Жон Сина Орландо хотод зохион байгуулагдсан “MegaCon” арга хэмжээний үеэр нэгэн шүтэн бишрэгчийнхээ хүнд хэцүү үед нь урам зориг хайрласан сэтгэл хөдөлгөм үйлдэл гаргалаа. Уг арга хэмжээний асуулт хариултын хэсэгт нэгэн фэн нь өөрийн эрүүл мэндийн хүнд нөхцөл байдлын талаар хуваалцаж, Жон Синаас тэврэлт гуйсан байна.
Жон Сина фэнийхээ хүсэлтэд огтхон ч эргэлзэлгүйгээр тайзнаас шууд бууж ирэн, түүнийг тэвэрч, сэтгэл санааны дэмжлэг үзүүлэх халуун дулаан үгсийг хэлжээ. “MegaCon” байгууллагын зүгээс энэхүү агшныг “Жон Синагийн гайхалтай хүн чанарыг харуулсан 46 секунд” хэмээн тодорхойлж, бичлэгийг цахим хуудсандаа нийтэлсэн нь олон нийтийн сүлжээнд өндөр хандалт аваад байна.
Энэхүү үйлдэл нь Жон Синагийн хувьд анхных биш бөгөөд тэрээр “Make-A-Wish” сангаар дамжуулан хүнд өвчтэй 650 гаруй хүүхдийн хүслийг биелүүлж, Гиннессийн дэлхийн дээд амжилтыг эзэмшдэг нэгэн юм. Тэрээр хэдийгээр Холливудын хамгийн эрэлттэй жүжигчдийн нэг болсон ч шүтэн бишрэгчидтэйгээ харилцах, тэдэнд урам зориг өгөх үйлсдээ цаг үргэлж сэтгэл харамгүй ханддаг гэдгээ ийнхүү дахин баталлаа.
