АНУ-ын Техас мужийн Хьюстон хотын орчимд өнгөрсөн амралтын өдрөөр асар том бөгөөд хурц гэрэлтэй солир (болиц) агаар мандалд дэлбэрч, олон зуун хүнийг гайхшруулсан ховор үзэгдэл боллоо. NASA-гийн мэдээлснээр, ойролцоогоор нэг тонн жинтэй, нэг метр орчим өргөнтэй уг биет бямба гарагийн орой 17:40 цагийн орчимд Хьюстоны тэнгэрт үзэгдэж, хүчтэй дуу чимээ гаргасан байна.
Америкийн Метеоритийн Нийгэмлэгт (AMS) энэхүү үзэгдлийн талаар 150 гаруй гэрчийн мэдээлэл ирсэн бөгөөд хүмүүс аянга ниргэх мэт хүчтэй чимээ сонсогдож, тэнгэрт гэрэлтсэн урт зураас үүссэнийг баримтжуулжээ. Уг солир нь далайн түвшнээс 78 км-ийн өндөрт анх харагдаж эхлэхдээ цагт 56,327 км-ийн асар өндөр хурдтайгаар нисэн өнгөрчээ. Агаар мандалд задрахдаа 26 тонн ТНТ дэлбэрэхтэй тэнцэх хэмжээний энерги ялгаруулсан нь Хьюстон хотын хойд хэсэгт таван хэсэг болон хуваагдаж унасан гэж эрдэмтэд таамаглаж байна.
Хамгийн сонирхолтой нь, солирын нэг хэсэг Хьюстоны хойд дүүргийн нэгэн айлын байшингийн дээвэр болон шалыг цоолон орж ирсэн байж болзошгүй тухай мэдээлэл гараад байна. Энэхүү явдалтай зэрэгцэн “солир хайгчид” тухайн бүс нутагт цугларч, сансрын чулууны хэлтэрхийнүүдийг эрж хайж эхэлжээ. Солирын хэлтэрхий нь шинжлэх ухааны төдийгүй эдийн засгийн асар өндөр үнэ цэнтэй байдаг бөгөөд өнгөрсөн онд Марсаас гаралтай солирын хэсэг дуудлага худалдаагаар 5.3 сая доллараар зарагдаж байсан түүхтэй юм.
