Боксын хүнд жингийн хамгийн ирээдүйтэй залуу тамирчдын нэг, 21 настай Мосес Итаума ирэх гуравдугаар сарын 28-нд Манчестер хотын “Co-op Live Arena”-д карьерынхаа хамгийн хүчтэй өрсөлдөгч болох Жермейн Франклинтэй тулалдахаар боллоо. Өмнө нь Диллан Уайтыг нэгдүгээр раундэд хүнд цохилтоор буулган авч шуугиан тарьсан Итаумагийн хувьд энэ удаагийн тулаан нь түүний жинхэнэ чансааг шалгах томоохон сорилт болох юм.
Жермейн Франклин нь 2023 онд Энтони Жошуатай 12 раунд тулалдаж, шүүгчдийн саналаар ялагдаж байсан туршлагатай тамирчин бөгөөд Итаумаг анх удаа хоёрдугаар раундаас илүү хугацаанд талбайд саатуулах чадвартай гэж шинжээчид үзэж байна. Хэрэв Итаума энэ тулаанд ялалт байгуулбал WBA “Regular” бүсийн аварга Мурат Гассиевтай тулалдах боломж нээгдэх юм.
Мурат Гассиев өнгөрсөн арванхоёрдугаар сард Дубай хотноо ахмад тамирчин Кубрат Пулевийг зургаадугаар раундэд техникийн нокаутаар буулган авч, аваргын бүсээ хамгаалсан билээ. Гэвч Гассиевын дасгалжуулагч Антон Кадушины мэдэгдсэнээр, Итаумагийн баг Пулевийг ялсны дараа тулааны хэлэлцээрээс “чимээгүй” татгалзаж, холбоо тасарсан гэх шүүмжлэл гараад байна. Кадушин хэлэхдээ “Бид Итаумагаас зайлсхийхгүй, хэрэв нөхцөл байдал тохирвол Гассиев түүнтэй хэзээд тулалдахад бэлэн” хэмээн онцолжээ.
WBA байгууллагын зүгээс энэхүү тулааныг албан ёсоор захиалсан тохиолдолд Итаума заавал Мурат Гассиевтай тулалдах шаардлагатай болно. Хэрэв тэрээр WBA “Regular” бүсийг авч чадвал хүнд жингийн бүрэн эрхт аварга болох зам нь шуудрах бөгөөд дэлхийн бусад томоохон боксын холбоодын анхаарлын төвд баттай орох юм. Одоогоор боксын ертөнц Итаумагийн Франклинтэй хийх тулааны үр дүнг анхааралтай ажиглаж байна.
