АНУ, Мексик болон Канад улсуудад зохион байгуулагдах 2026 оны хөлбөмбөгийн дэлхийн аварга шалгаруулах тэмцээний бэлтгэл ажил үргэлжилж буй энэ үед ФИФА байгууллага хүлээн авагч хотууд дахь зочид буудлын урьдчилсан захиалгуудаа цуцалж эхэлсэн байна. Одоогоор Филадельфи болон Мехико хотуудад ийм төрлийн цуцлалт хийгдсэн нь тодорхой болоод байгаа юм.
АНУ-ын Филадельфи хотын Зочид буудлын холбооны мэдээлснээр, ФИФА тус хотод урьдчилан захиалаад байсан 10,000 орчим өрөөнийхөө 2,000 орчмыг нь цуцалжээ. Холбооны ерөнхийлөгч Эд Гроуз хэлэхдээ, уг цуцлалтыг гэрээний нөхцөлийн дагуу ямар нэгэн торгуульгүйгээр гүйцэтгэсэн бөгөөд энэ нь дэлхийн хэмжээний томоохон арга хэмжээний зохион байгуулалтын ердийн зохицуулалт байж болзошгүйг онцолсон байна. Хэдийгээр ФИФА-гийн зүгээс тодорхой шалтгаан хэлээгүй ч тус хотод ДАШТ-ий үеэр бусад томоохон арга хэмжээнүүд давхцаж байгаа тул өрөөний дүүргэлтэд асуудал үүсэхгүй гэж үзэж байгаа аж.
Үүнтэй ижил нөхцөл байдал Мексикийн нийслэл Мехико хотод ч ажиглагдлаа. Тус хотын Зочид буудлын холбооны захирал Альберто Альбарран Лейвагийн мэдээлснээр, ФИФА урьдчилан захиалсан 2,000 өрөөнийхөө 800 орчмыг нь буцаасан байна. Тэрээр үүнийг тайлбарлахдаа ФИФА эхний ээлжинд хэрэгцээгээ хэтрүүлэн тооцож захиалга өгөөд, дараа нь бодит зохион байгуулалтдаа тааруулан илүүдэл өрөөнүүдээ суллаж байгаа нь тэмцээний бэлтгэл ажлын энгийн нэг хэсэг хэмээн үзэж байгаагаа илэрхийлжээ.
2026 оны дэлхийн аварга шалгаруулах тэмцээний үеэр АНУ, Мексик, Канад улсын хотуудад нийтдээ 5-6.5 сая орчим тамирчин, албаны хүмүүс болон үзэгчид хүрэлцэн ирнэ гэсэн урьдчилсан тооцоог ФИФА гаргаад байна. Захиалга цуцлагдсантай холбоотойгоор зочид буудлын үнэ ханшид хэрхэн өөрчлөлт орох нь одоогоор тодорхойгүй байгаа ч аялагчдыг эртнээс төлөвлөлтөө хийхийг мэргэжилтнүүд зөвлөж байна.
