Калифорни мужийн иргэний хэргийн шүүхээс алдарт жүжигчин Билл Косбиг 1972 онд үйлдэгдсэн бэлгийн хүчирхийллийн хэрэгт буруутай гэж үзэн, хохирогчид 19.25 сая ам.долларын нөхөн төлбөр олгох шийдвэр гаргалаа. Санта-Моника хотод хоёр долоо хоног үргэлжилсэн шүүх хурлын дараа шүүгчид Донна Мотсингер хэмээх эмэгтэйн гомдлыг үндэслэлтэй гэж үзсэн байна.
Өдгөө 88 настай Билл Косби нь 1970-аад оны эхээр Саусалито хотод үйлчлэгчээр ажиллаж байсан Мотсингерийг өөрийн тоглолтдоо урьж, улмаар согтууруулах ундаа ашиглан ухаан алдуулж, хүчирхийлсэн гэх хэрэгт ийнхүү буруутгагдлаа. Хохирогчийн мэдүүлснээр тэрээр архи уусны дараа ухаан алдаж, лимузин автомашинд хагас нүцгэн байдалтай сэрсэн бөгөөд Косбигийн зүгээс бэлгийн дарамт үзүүлснийг тухайн үед мэдэрсэн гэжээ. Шүүх бүрэлдэхүүн нэг өдрийн турш хэлэлцсэний эцэст Мотсингерд өнгөрсөн хугацааны сэтгэл зүйн хохиролд 17.5 сая ам.доллар, ирээдүйн эмчилгээ болон зовиурт 1.75 сая ам.доллар, нийт 19 сая гаруй ам.долларын нөхөн төлбөр оноосон байна.
Билл Косбигийн өмгөөлөгчдийн зүгээс энэхүү шийдвэрийг эрс эсэргүүцэж, хохирогчийн мэдүүлгийг баримт нотолгоогүй, зөвхөн таамаглал дээр үндэслэсэн хэмээн үзэж байгаагаа илэрхийлэн давж заалдахаа мэдэгдлээ. Хэдийгээр Косби өмнө нь эрүүгийн хэргээр хорих ял эдэлж байгаад улсын Дээд шүүхийн шийдвэрээр суллагдсан ч иргэний шүүхийн энэхүү шийдвэр нь түүний нэр хүнд болон санхүүд томоохон цохилт болж байна. Одоогоор шүүхийн зүгээс нэмэлт шийтгэлийн хэлэлцээг үргэлжлүүлж байгаа бөгөөд нөхөн төлбөрийн хэмжээ цаашид нэмэгдэж магадгүй байна.
