Америкийн эрдэмтэд Бартрамын болон Алтамаха хэмээх хоёр шинэ төрлийн хар алаг загасыг (Bass) албан ёсоор тодорхойлж, шинжлэх ухааны бүртгэлд орууллаа. Эдгээр загаснууд өмнө нь байгаль дээр ажиглагддаг байсан ч улаан нүдтэй алаг загасны нэг төрөл хэмээн андуурагдаж ирсэн юм. Нарийвчилсан судалгаа болон ДНХ-ийн шинжилгээний үр дүнд тэдгээрийг бие даасан тусдаа зүйл болохыг нь ийнхүү баталгаажуулжээ.
Судалгааны явцад 570 гаруй загасны дээжийг харьцуулж үзэхэд Бартрамын алаг загас нь алтлаг өнгөтэй, хажуу талдаа бараан толботой, ягаан туяатай сэлүүртэй болох нь тогтоогдсон байна. Харин Алтамаха алаг загас нь мөн алтлаг өнгөтэй боловч ногоовтор ирмэгтэй, илүү бараан толботой, улбар шар туяатай сэлүүрээрээ ялгарч байв. Бартрамын алаг загасны шинжлэх ухааны нэршил нь Флоридагийн Семинол-Крик омгийн ахлагчийн нэрээр нэрлэгдсэн бөгөөд “Цэцэг хайгч” гэсэн утгатай бол Алтамаха загасны нэр нь “сайхан сэлүүр” гэсэн утгыг агуулж байна.
Эдгээр загаснууд голын урсгал дагасан экосистемд амьдардаг бөгөөд хүний үйл ажиллагаа, тэр дундаа далан барих болон орчны бохирдлоос шалтгаалж амьдрах орчин нь хумигдаж, эрсдэлд ороод байгааг судлаачид анхаарууллаа. Түүнчлэн нутаг бус газарт өөр төрлийн алаг загасыг нутагшуулснаас үүдэн хоорондоо эрлийзших аюул тулгарч байгаа нь тэдний генийн цэвэр байдал, ирээдүйд оршин тогтнох баталгааг алдагдуулж байна.
Шинэ төрлийн загаснуудыг илрүүлсэн энэхүү судалгааны тайлан “Zootaxa” сэтгүүлд нийтлэгдсэн бөгөөд байгаль хамгаалагчид эдгээр ховор зүйлүүдийг хамгаалалтад авах шаардлагатайг онцолж байна.
