SpaceX компанийн үүсгэн байгуулагч Илон Маск сансарт дата төв байгуулах зоригтой алхам хийхээр төлөвлөж байгаа ч шинжээчид үүнийг өндөр эрсдэлтэй төсөл хэмээн анхааруулж байна. Өмнө нь Microsoft компани 2015 онд Шотландын эргээс холгүй далайн гүнд “Project Natick” нэртэй туршилтын дата төв байгуулж байсан ч эдийн засгийн үр ашиггүй байдлын улмаас уг төсөл амжилт олж чадаагүй юм.
Далайн гүн дэх төсөл нь усаар хөргөх, сэргээгдэх эрчим хүч ашиглах зэрэг шинэлэг шийдэл санал болгосон ч засвар үйлчилгээ болон шинэчлэлт хийх боломжгүй модулиудад тулгуурласан нь гол сул тал болсон. Сансрын дата төвүүдэд ч мөн адил асуудал тулгарах бөгөөд сансрын ууддамд байрлуулсан техник хангамжийг AI (хиймэл оюун ухаан) технологийн хурдацтай хөгжилд нийцүүлэн байнга шинэчлэх нь технологийн хувьд асар хүнд сорилт юм.
Маскын төлөвлөж буй сансрын дата төвүүдийн сүлжээ нь Олон улсын сансрын станцаас ч том хэмжээтэй байх бөгөөд тэдгээрийг байрлуулах өртөг нь 1 их наяд ам.доллараас давна гэсэн тооцоо бий. Үүний тулд SpaceX компани өдөрт дунджаар 8 удаа буюу жилд 3,000 орчим Starship пуужин хөөргөх шаардлагатай болно. Starship нь дахин ашиглагдах, их хэмжээний ачаа тээх чадвартай ч одоогоор туршилтын шатандаа явааг шинжээчид сануулж байна.
Сансрын дата төвүүд нь ирээдүйд цэргийн тусгай зориулалттай эсвэл сансрын станцуудад нэмэлт хүчин чадал болох боломжтой ч, газар дээрх дата төвүүдийг бүрэн орлох эдийн засгийн боломж одоогоор хомс байна. Технологийн хөгжил болон хэрэглэгчдийн эрэлт хэрэгцээ энэхүү “оддын хоорондох” дата төвүүдийг бодит ажил хэрэг болгож чадах эсэх нь ирэх жилүүдийн хамгийн сонирхолтой сэдэв байх болно.
