“The Super Mario Bros. Movie” хүүхэлдэйн киноны асар их амжилтын дараа үзэгчдийн дунд дараагийн ангид ямар дүрүүд шинээр гарч ирэх тухай хэлэлцүүлэг өрнөж байна. Шүтэн бишрэгчдийн зүгээс Мариогийн “эсрэг талын” дүр болох Варриог (Wario) дараагийн ангид оруулахыг хүсэж байгаа бөгөөд уг дүрд алдарт жүжигчин Дэнни ДеВитог тоглуулах санал хамгийн өндөр байна.
“It’s Always Sunny in Philadelphia” цувралын хамтрагч жүжигчин Чарли Дэй саяхан өгсөн ярилцлагадаа Дэнни ДеВитог Варриогийн дүрд тоглуулах нь хамгийн оновчтой сонголт байх болно гэдгийг онцолжээ. Жүжигчин ДеВито өөрөө ч энэ саналыг таатай хүлээн авч, Варриогийн дүрийг бүтээхэд бэлэн байгаагаа хошигнон илэрхийлээд байна.
Одоогийн байдлаар “The Super Mario Bros. Movie” болон саяхан нээлтээ хийсэн “The Super Mario Galaxy Movie” кинонууд бокс оффисын дээд амжилтуудыг эвдсээр байгаа юм. Nintendo компани 2024 онд дахин нэг Мариогийн кино төсөл дээр ажиллаж байгаагаа зарласан бөгөөд хэрэв цувралын уламжлал хадгалагдвал гурав дахь анги нь 2027-2029 оны хооронд үзэгчдийн хүртээл болох магадлалтай байна.
Хэдийгээр Варриогийн дүр одоогоор албан ёсоор батлагдаагүй байгаа ч Баузерын дүрийг бүтээсэн Жак Блэк болон бусад уран бүтээлчид дараагийн ангиудад шинэ дүрүүд нэмэгдэх хүлээлттэй байгаагаа нуугаагүй юм. Дэнни ДеВито өмнө нь “Мөрдөгч Пикачу” киноны гол дүрд тоглуулах интернэт санал асуулгад тэргүүлж байсан туршлагатай бөгөөд энэ удаад түүнийг Варриогийн дүрээр харахыг хүссэн шүтэн бишрэгчдийн давалгаа улам хүчтэй өрнөж байна.
