Персийн булан дахь мөргөлдөөн эхэлснээс хойш нэг сар гаруй хугацаанд шатахууны үнэ дунджаар нэг галлон тутамд ойролцоогоор 1 ам. доллараар буюу 25 хувиар өсөөд байна. Энэ нь автомашины хэрэглээ өндөртэй АНУ-ын хувьд таагүй мэдээ боловч цахилгаан автомашины зах зээлд ч нөхцөл байдал хүнд хэвээр байна.
Сүүлийн хагас жилийн хугацаанд АНУ-д цахилгаан автомашины хэрэглээний өсөлт саарч, хэрэглэгчид хүлээн авах байдал хүндэрчээ. Өнгөрсөн оны есдүгээр сарын сүүлээр Трампын засаг захиргаа шинэ болон хуучин цахилгаан автомашинуудад олгодог холбооны татварын хөнгөлөлтийг цуцалсан нь автомашин үйлдвэрлэгчдийг цахилгаан загварын үйлдвэрлэлээс татгалзах, хэрэглэгчдийг худалдан авалтаа хойшлуулахад хүргэсэн бодлогын нэг хэсэг болсон юм. Үүний улмаас батерей үйлдвэрлэх төслүүд цуцлагдаж, цахилгаан автомашины загваруудын тоо цөөрч, үйлдвэрлэгч компаниуд тэрбум гаруй ам. долларын алдагдал хүлээгээд байна.
Шинжээчид 2026 оны эхний улирлыг салбарын хувьд онцгой хүндрэлтэй байхаар таамаглаж байна. Тухайлбал, Cox Automotive байгууллага энэ оны эхний гурван сард шинэ автомашины нийт борлуулалт 6.5 хувиар, үүнээс цахилгаан автомашины борлуулалт 28 хувиар буурах төлөвтэй байгааг анхаарууллаа.
Хэрэв шатахууны үнэ тогтвортой өндөр хэвээр байхгүй бол хүмүүс цахилгаан автомашин руу шилжих бус, харин аялал болон тээвэрлэлтээ багасгах хандлагатай байгааг Cox-ийн салбарын шинжилгээний захирал Стефани Валдез Страти онцолжээ. Тэрээр “Хэрэглэгчдийн худалдан авах зан үйлийг үндсээр нь өөрчилж, илүү хэмнэлттэй автомашинуудыг сонгох чиг хандлагыг бий болгохын тулд шатахууны үнэ хэдхэн сар биш, хэдэн жилийн турш өндөр байх болно гэдэгт хэрэглэгчид итгэх ёстой” хэмээн тайлбарласан байна.
