Дэлхий даяар санах ой буюу RAM-ийн хомсдол үүсэж, үнэ нь хяналтгүй өсөж буй “RAMageddon” нөхцөл байдал тоглоомын тоног төхөөрөмжийн зах зээлийг хүнд цохилтод оруулж байна. Үүний улмаас удахгүй худалдаанд гарах Lenovo Legion Go 2 төхөөрөмжийн үнэ хүлээгдэж байснаас 650 ам.доллароор илүү буюу нийт 2000 ам.долларт хүрэхээр байгаа нь хэрэглэгчдийг гайхшруулаад байна.
Энэхүү үнэ нь ижил төрлийн AMD чип ашигладаг ROG Ally X төхөөрөмжөөс бараг хоёр дахин өндөр байгаа юм. Хэдийгээр Legion Go 2 нь илүү том, чанартай дэлгэц болон салдаг удирдлага зэрэг давуу талтай боловч ийм өндөр үнээр борлуулагдах нь ихэнх тоглогчдод хэтэрхий үнэтэй тусахаар байна. Харин Asus компанийн төлөөлөгч одоогоор АНУ-ын зах зээлд ROG Ally X-ийн үнийг нэмэх төлөвлөгөөгүй байгаагаа мэдэгджээ.
Санах ойн хомсдол нь зөвхөн гар төхөөрөмж бус тоглоомын консолын зах зээлд ч нөлөөлж байна. Тухайлбал, Sony компани PlayStation 5 консолынхоо үнийг бүс нутгаасаа хамааран 100-150 ам.доллароор нэмсэн бол Ayaneo компани хадгалах төхөөрөмжийн үнэ өссөнтэй холбоотойгоор Next 2 төхөөрөмжийнхөө үйлдвэрлэлийг бүрмөсөн зогсоожээ. Мөн GPD компани шинээр гаргаж буй Strix Halo чиптэй төхөөрөмжүүдийнхээ үнийг нэмж, 32GB RAM-тай GPD Win 5 загвараа 2500 ам.доллароор борлуулж эхэлсэн байна.
Салбарын шинжээчдийн үзэж буйгаар Microsoft компани ч мөн Xbox-ийн гар төхөөрөмжийнхөө үнийг нэмэх магадлал өндөр байгаа бөгөөд энэхүү “санах ойн дайн” нь тоглоомын техник хангамжийн ирээдүйг тодорхойгүй байдалд оруулж байна. 2026 он гарснаар техник хангамжийн үнэ тогтворжих бус, харин ч хомсдолоос шалтгаалан улам бүр өсөх хандлагатай байгаа нь тоглоом сонирхогчдод томоохон сорилт болж байна.
