Стивен Спилбергийн удахгүй нээлтээ хийх Disclosure Day шинжлэх ухааны зөгнөлт киноны талаарх дэлгэрэнгүй мэдээллийг Empire Magazine сэтгүүл онцолж, гол дүрүүдийн үүргийг тодорхой болгожээ. Энэхүү кинонд хүн төрөлхтний дунд харь гарагийнхан нууцаар амьдарч буй тухай болон тэдний оршихуйг илчлэх гэсэн оролдлогуудын талаар өгүүлэх юм.
Жүжигчин Эмили Блант Канзас Ситигийн телевизийн цаг уурч Маргарет Фэйрчайлдын дүрийг бүтээжээ. Тэрээр шууд нэвтрүүлгийн үеэр харь гарагийнхантай холбоотой байж болох хачирхалтай авиа гаргаж эхэлснээр үйл явдал өрнөх аж. Харин Жош О’Коннор засгийн газрын өндөр нууцлалтай мэдээллийг олж мэдсэн кибер аюулгүй байдлын шинжээч Дэниел Келлнерийн дүрд тоглох бөгөөд тэрээр энэхүү нууцыг дэлхий нийтэд дэлгэхээр зориг шулууддаг байна.
Эв Хьюсон Дэниелийн найз бүсгүй Жэйн Блакеншипийн дүрийг бүтээх бөгөөд найз залуугийнхаа үнэний төлөөх тэмцлээс үүдэлтэй хүндрэлүүдтэй нүүр тулах болно. Колмэн Доминго нууцыг илчлэхийг дэмжигч Хюго Уэйкфилдийн дүрд тоглох бол Колин Фөрт Wardex корпорацын удирдагч, сөрөг талын дүр болох Ноа Скэнлоны дүрийг бүтээжээ. Ноа Скэнлон нь харь гарагийн дэвшилтэт технологийг ашиглан бусдыг хянах, өөрийгөө хаана ч хамаагүй харуулах чадвартай нууцлаг этгээд байх юм.
Disclosure Day кино ирэх зургаадугаар сарын 12-нд албан ёсоор нээлтээ хийнэ. Киноны зохиолыг Спилбергийн өөрийнх нь санаанаас сэдэвлэн Журассик Парк киноны зохиолч Дэвид Коепп бичсэн бөгөөд хүн төрөлхтөн орчлон ертөнцөд ганцаараа биш гэдгээ мэдсэн тэр өдөр ертөнц хэрхэн өөрчлөгдөх тухай сонирхолтой түүхийг өгүүлэхээр хүлээгдэж байна.
