Хүнд жингийн шинэ од Мосес Итаума өнгөрсөн бямба гарагт Манчестер хотын “Co-op Live” ордонд болсон тулаанд туршлагатай боксчин Жермейн Франклинийг тавдугаар үед хүнд нокаутаар буулган авч, ээлжит ялалтаа байгууллаа. Өмнө нь Энтони Жошуа, Диллиан Уайт нартай тулалдахдаа хэзээ ч дутуу гаргаж байгаагүй Франклинийг Итаума ийнхүү зогсоосон нь боксын ертөнцийг гайхшруулав.
Ялалтынхаа дараа 21 настай залуу боксчин Итаума цаашдын төлөвлөгөөнийхөө талаар нээлттэй ярилцлага өгсөн байна. Тэрээр өөрийн дараагийн өрсөлдөгчөөр Филип Хрговичийг сонгох хүсэлтэй байгаагаа илэрхийлсэн юм. Хрговичийн хувьд ирэх тавдугаар сарын 16-нд Дэйв Аллентай тулалдахаар товлогдсон бөгөөд хэрэв ялалт байгуулбал Итауматай нүүр тулах өндөр магадлалтай байна.
Итаума мөн дэлхийн аварга Александр Усиктай тулалдах сонирхолтой байгаагаа дурдсан боловч Усик ирэх тавдугаар сарын 23-нд Египетэд болох “Glory in Giza” арга хэмжээний хүрээнд кикбоксын домог Рико Верхоевентой WBC бүсний төлөө тулалдахаар болсон. Усик залуу боксчинг “бэртээхийг хүсэхгүй байна” гэх шалтгаанаар одоогоор Итауматай тулалдахаас татгалзаж буйгаа илэрхийлээд байгаа юм.
Үүнээс гадна туршлагатай боксчин Дерек Чизорагийн зүгээс Итаумаг Америкийн Майкл Хантертэй тулалдуулах санал гаргасан нь боломжит хувилбаруудын нэгд тооцогдож байна. Итаума энэ тухай “Майкл Хантертэй Америкт тулалдах нь сонирхолтой байх болов уу. Гэхдээ би одоогоор тодорхой шийдвэр гаргаагүй байна. Тун удахгүй менежер Франк Уоррентой уулзаж, дараагийн алхмаа шийднэ” хэмээжээ. Итаумагийн хувьд 2026 онд дэлхийн аваргын бүсний төлөө өрсөлдөх зорилготой байгаа тул түүний дараагийн тулаан тун хариуцлагатай байх нь дамжиггүй.
