Холливудын алдарт жүжигчид болох Анжелина Жоли, Брэд Питт нарын охин Шайло Жоли К-поп ертөнцөд хөл тавьж, шуугиан тариад байна. Тэрээр WJSN хамтлагийн гишүүн Даёны “What’s a girl to do” нэртэй бие даасан шинэ синглийн клипэнд туслах бүжигчнээр оролцон тогложээ.
“STARSHIP Entertainment” агентлагийн мэдээлснээр, клипний зураг авалтын бэлтгэл ажлын хүрээнд АНУ-д нээлттэй кастинг зарласан бөгөөд Шайло олон зуун бүжигчдийн адил шалгаруулалтад биеэр ирж оролцсон байна. Сонирхолтой нь, агентлагийн зүгээс түүнийг алдартнуудын охин гэдгийг тухайн үед мэдээгүй бөгөөд зөвхөн бүжгийн ур чадвар, гүйцэтгэл дээр нь үндэслэн сонгосон гэдгээ онцолжээ. Ийнхүү тэрээр өөрийн нэр алдраар бус, авьяас чадвараараа энэхүү боломжийг авсан байна.
Даёны шинэ уран бүтээл болох “What’s a girl to do” дууны клип дөрөвдүгээр сарын 7-ны 18:00 цагт албан ёсоор цацагдах хуваарьтай байна. Холливуд болон К-поп ертөнцийн энэхүү сонирхолтой хамтрал нь хөгжим сонирхогчдын дунд ихээхэн хүлээлт үүсгээд байна.
