Лондонгийн “Тоттенхэм Хотспур” клуб ирэх зуны солилцоо наймааны цонхоор “Вест Хэм Юнайтед” багийн жигүүрийн тоглогч Крисенсио Саммервиллийг элсүүлэхээр төлөвлөж байна. Өдгөө 24 настай Голландын залуу тоглогч 2024 оны зун “Лийдс Юнайтед” багаас “Вест Хэм”-д ирсэн бөгөөд эхэндээ бага зэргийн бэрхшээлтэй тулгарч байсан ч сүүлийн үед онцгой тоглолтыг үзүүлэх болсон юм.
Саммервилл энэ улиралд долоон гоол оруулж, дөрвөн оновчтой дамжуулалт өгөөд байгаа нь амжилт тааруу байгаа багийнхаа хувьд шилдэг үзүүлэлт болоод байна. Ялангуяа тэрээр сүүлийн арван тоглолтынхоо наймд нь ямар нэг байдлаар гоолын хувь нэмэр оруулсан нь түүний тогтвортой байдлыг илтгэж байгаа юм. Тэрээр нэгдүгээр сард таван тоглолт дараалж гоол оруулснаар 2021 оноос хойш ийм амжилт үзүүлсэн “Вест Хэм”-ийн анхны тоглогч болжээ.
TEAMtalk-ийн мэдээлснээр, Саммервиллийн үзүүлж буй амжилт нь түүнийг багийнхаа хамгийн үнэ цэнэтэй тоглогчдын нэг болгосон бөгөөд “Вест Хэм” лигт үлдэж чадах эсэхээс үл хамааран тэрээр зун багаа орхих магадлал өндөр байна. “Тоттенхэм” түүнийг довтолгооны жигүүрийг бэхжүүлэх динамик тоглогч гэж үзэж байгаа ч одоогоор албан ёсны санал хүргүүлээгүй байгаа аж.
Гэсэн хэдий ч Саммервиллийн төлөөх өрсөлдөөн ширүүн байх төлөвтэй байна. “Тоттенхэм”-ээс гадна Премьер лигийн “Астон Вилла”, “Борнмут”, “Эвертон” болон Европын “Наполи”, “Аталанта”, “Вильярреал” зэрэг багууд түүнийг сонирхож байгаа юм. “Вест Хэм” клуб тоглогчоо авч үлдэхийг хүсэж байгаа ч санхүүгийн хүндрэлтэй нөхцөл байдлаас шалтгаалан 25-35 сая фунт стерлингийн санал ирвэл түүнийг худалдах боломжтой гэж эх сурвалжууд мэдээлж байна.
