Иран улс Израиль руу чиглэсэн довтолгоондоо өндрөөс хуваагддаг сумтай баллистик пуужин ашиглаж эхэлснээр тус улсын агаарын довтолгооноос хамгаалах системд бодит сорилт учруулж байна. Ялангуяа David’s Sling зэрэг дунд тусгалын хамгаалалтын системүүдийн үр ашигт энэ нь нөлөөлж эхэлжээ.
Сүүлийн таван долоо хоногийн хугацаанд Иран улс Израиль руу 500 гаруй баллистик пуужин харвасан бөгөөд үүний дор хаяж 30 нь хуваагддаг сум (cluster warhead)-тай байсан байна. Эдгээр пуужингууд ихэвчлэн 7–8 км өндрөөс сум тарааж, 11–13 км орчим талбайг хамардаг бол зарим тохиолдолд 20 гаруй км-ийн өндрөөс задран тархаж байгаа нь хамгаалалтын системүүдийн хариу үйлдлийг хүндрүүлж байна.
Хуваагддаг сумтай пуужингийн гол онцлог нь нэгэн пуужингаас олон тооны жижиг сум задран гарч, өргөн талбайд зэрэг цохилт өгөх чадвартай байдагт оршино. Энэ нь бай устгах магадлалыг нэмэгдүүлэхээс гадна хамгаалалтын системүүдийг “ачаалалд оруулж”, нөөцийг нь хурдан шавхах эрсдэл дагуулдаг.
Ийм төрлийн довтолгоо нь зөвхөн дунд шатны хамгаалалтын системүүдэд төдийгүй Patriot missile system, THAAD зэрэг өндөр түвшний системүүдэд ч хүндрэл үүсгэж болзошгүй. Учир нь нэг пуужинг устгахын тулд олон тооны эсэргүүцэх пуужин ашиглах шаардлага гарч, системийн үр ашиг буурах нөхцөл бүрддэг.
Энэхүү шинэ тактик нь зөвхөн Ойрх Дорнодын бүс нутгийн аюулгүй байдалд нөлөөлөхөөс гадна дэлхийн цэргийн стратегид ч анхаарал татаж байна. Ялангуяа АНУ болон түүний холбоотнуудын хувьд, ирээдүйд БНХАУ ийм төрлийн зэвсгийг ашиглах боломжит нөхцөл байдал нь Номхон далайн бүс дэх цэргийн байгууламжуудын хамгаалалтад шинэ сорилт авчирч болзошгүй гэж шинжээчид үзэж байна.
