Канадын эрдэмтэд тархины хамгийн түрэмгий бөгөөд одоогоор эмчлэгдэх боломжгүй гэгдэж буй глиобластома хавдрын өсөлтийг зогсоох шинэ арга замыг нээлээ. МакМастер их сургууль болон SickKids эмнэлгийн судлаачид хамтран хавдрын эсийг дэмждэг “нууц” системийг илрүүлсэн бөгөөд үүнийг ХДХВ-ийн эсрэг ашигладаг эмээр эмчлэх боломжтойг тогтоосон байна.
Өмнө нь эрдэмтэд глиобластомаг зөвхөн хавдрын эсүүдийн бөөгнөрөл гэж үздэг байсан бол шинэ судалгаагаар энэ нь харилцан үйлчлэлцэгч эсийн нарийн систем болох нь тодорхой болов. Тархины эрүүл эсийг хамгаалах үүрэгтэй “олигодендроцит” хэмээх эсүүд хавдрын нөлөөгөөр өөрчлөгдөж, хавдрын өсөлт, тархалтад шаардлагатай дохиоллыг дамжуулдаг байна. Өөрөөр хэлбэл, хавдар тархины эрүүл эсүүдийг өөрийнхөө “холбоотон” болгон хувиргадаг аж.
Энэхүү харилцааг таслахад CCR5 хэмээх рецептор гол үүрэг гүйцэтгэдэг болохыг эрдэмтэд олж тогтоожээ. Хамгийн сонирхолтой нь, энэхүү рецепторыг дарангуйлах чадвартай “Маравирок” (Maraviroc) хэмээх эм хэдийнэ ХДХВ-ийн эмчилгээнд ашиглагдаад эхэлсэн байна. Лабораторийн туршилтаар уг эмийн тусламжтайгаар эсүүдийн хоорондын “хортой” холбоог таслахад хавдрын өсөлт эрс буурчээ.
Энэхүү нээлт нь глиобластома зэрэг хүнд өвчнийг эмчлэхэд асар том дэвшил авчирч байна. Учир нь шинээр эм гаргаж авах олон жилийн туршилт, судалгааны шатыг алгасаж, хэдийнэ батлагдсан эмийг шинэ зориулалтаар ашиглах замаар эмчилгээний үр дүнг хурдан хугацаанд үзэх боломжтой юм. Судалгааны багийнхан цаашид энэ аргыг эмнэлзүйн практикт нэвтрүүлэхээр ажиллаж байна.
