Технологийн салбарт хиймэл оюун ухаан эрчтэй нэвтэрч, олон ажлын байрыг орлох тухай таамаглал гарч байгаа ч бодит байдал дээр программ хангамжийн инженерүүдийн эрэлт буураагүй байна. TrueUp компанийн саяхан гаргасан тайлангаар энэ оны эхнээс хойш программ хангамжийн инженерийн ажлын байрны зар 30 хувиар өссөн үзүүлэлттэй гарчээ.
Энэхүү судалгаа нь хиймэл оюун ухаан программистуудыг ажилгүй болгоно гэсэн түгээмэл ойлголтыг үгүйсгэж байна. Өмнө нь Citri Research-ийн тайланд хиймэл оюун ухаан нь цагаан захтнуудын ажлыг булааж, АНУ-д ажилгүйдлийг 10.2 хувьд хүргэнэ гэж таамаглаж байсан бол тэрбумтан Марк Кубан программ хангамжийн эрин үе дууссан хэмээн мэдэгдэж байв. Гэвч TrueUp-ийн мэдээлснээр одоогоор салбарын хэмжээнд 67,000 орчим нээлттэй ажлын байр зарлагдсан нь сүүлийн гурван жилийн хамгийн өндөр үзүүлэлт болоод байна.
Хэдийгээр ажлын зар их байгаа ч ажил хайгчдын хувьд нөхцөл байдал амаргүй хэвээр байна. Atlantic сэтгүүлийн онцолсноор компаниуд зар тавьдаг ч бодит байдал дээр хүн ажилд авахгүй байх тохиолдол ихэссэн бөгөөд үүнийг сүнс ажлын байр гэж нэрлэх болжээ. Мөн ажил горилогчид анкет бичихдээ ChatGPT ашигладаг бол хүний нөөцийн системүүд тэдгээрийг шүүхдээ мөн л хиймэл оюун ухаан ашиглаж байна. Guardian сонинд бичсэнээр ажилд авах үйл явц хэт автоматжуулсан тул зөвхөн системийн тоглоомыг сайн мэддэг хүмүүс л шалгарах магадлал өндөр болсон байна.
Хиймэл оюун ухааны хэрэгслүүд программ хангамж бүтээх хурдыг асар ихээр нэмэгдүүлж байгаа нь ажиглагдаж байна. Тухайлбал, 2024-2025 онд Apple-ийн App Store-д шинээр нэмэгдсэн аппликэйшны тоо 30 хувиар өсжээ. Үүнийг мэргэжилтнүүд vibe coding буюу гүнзгий мэдлэггүй ч хиймэл оюун ухаан ашиглан хэн ч код бичиж чадах нөлөөтэй холбон тайлбарлаж байна.
Гэвч энэхүү тоон өсөлт нь чанарын асуудлыг дагуулж байгааг Google-ийн нэгэн инженер санууллаа. Тэрээр их хэмжээний чанаргүй код үйлдвэрлэгдэх нь нийт программ хангамжийн экосистемд хор хөнөөлтэй бөгөөд муу код ихсэх тусам түүнийг засаж, арчлах ажил хүн бүрт дарамт болно гэж онцолжээ. Иймд тоон үзүүлэлт өссөн ч салбарын мэргэжилтнүүдээс илүү өндөр хариуцлага, чанар шаардагддаг шинэ үе ирж байна.
