Дэлхийн хэмжээний поп од Тэйлор Свифт болон “Канзас Сити Чифс” багийн тоглогч Трэвис Келси нарын хуримын тов, байршил тодорхой болсон тухай мэдээллүүд сүүлийн үед эрчээ аваад байсан билээ. Тухайлбал, тэднийг ирэх зургаадугаар сарын 13-нд Род-Айленд мужийн Оушн Хаус далайн эрэг дэх амралтын газарт хуримаа хийхээр төлөвлөсөн гэх мэдээлэл тархаад байв.
Гэвч алдартнуудын хуримын төлөвлөгч Тара Гуерард ням гарагт эдгээр мэдээллийг албан ёсоор үгүйсгэжээ. “Tara Guerard Soiree” компанийн эзэн тэрээр зургаадугаар сарын 13-нд Оушн Хаус амралтын газарт хуримын арга хэмжээ зохион байгуулах гэж байгаа нь үнэн боловч энэ нь Свифт, Келси нарын хурим биш гэдгийг онцлон мэдэгдсэн байна.
Хос хоёр өнгөрсөн оны наймдугаар сарын 26-нд Инстаграм хуудсаараа дамжуулан сүй тавьснаа олон нийтэд зарласан юм. “Та бүхний англи хэлний багш болон биеийн тамирын багш нар гэрлэх гэж байна” хэмээх тайлбартай тэдний хамтарсан зураг 37.5 сая гаруй лайк авч, цахим орчинд шуугиан тарьж байв.
Сүй тавьснаа зарласнаас хойш шүтэн бишрэгчид нь тэднийг хэзээ, хаана хуримаа хийх бол хэмээн таамаг дэвшүүлсээр байгаа юм. Хэдийгээр олон нийт дэлгэрэнгүй мэдээлэл авахыг хүсэж байгаа ч хуримын ёслол нь олны анхаарлаас хол, маш нууцлаг байдалд болох төлөвтэй байна. “Энэ бол шоу биш, зөвхөн гэр бүл, ойр дотныхонд зориулсан хувийн арга хэмжээ байх болно” гэж эх сурвалжууд People сэтгүүлд өгсөн ярилцлагадаа дурджээ.
